Shymkent qalasynda birneshe jyldan beri qaraýsyz bos turǵan «Fosforshylar» mádenıet úıi qaıta jóndelip, halyq ıgiligine qyzmet etpek, dep jazady “Adyrna” portaly. Bul týraly Shymkent qalasynyń ákimi Ǵabıt Syzdyqbekov málimdedi.
Atalǵan ǵımarat «Darhan grýpp» seriktestiginiń menshiginde bolatyn. Ákimniń aıtýynsha endi ákimdim ǵımaratty qaıta jóndep, Jastar saraıyna aınaldyrmaq.
“Shymkent qalasynyń ákimdigi qalalyq prokýratýra men memlekettik múlik jáne jekeshelendirý departamentimen birlesip, mádenıet úıin qalanyń kommýnaldyq menshigine qabyldaý boıynsha algorıtm ázirlegen bolatyn. 13 qarasha kúni «Fosforshylar» mádenıet úıin qalanyń kommýnaldyq menshigine qaıtarý boıynsha kelisimge qol jetkizildi. Ary qaraı ǵımaratty kópfýnkıonaldy Jastar saraıy retinde qaıta qalpyna keltirý jáne aýmaǵyn abattandyrý jumystary júrgiziletin bolady” dep jazdy Ǵabıt Syzdyqbekov.
Sondaı-aq ol, «Fosforshylar» saraıy qalanyń eń kórikti jerleriniń birine aınalatynyna jáne halyq ıgiligine qyzmet etetinine senim bildirdi.
