Qyrǧyzstan prezidentı Sadyr Japarov Niu-Iorkte ötken BŪŪ Bas Assambleiasynyŋ 80-sessiiasyndaǧy plenarlyq otyrysta ekı qyrǧyz bankıne qarsy engızılgen sanksiialardy alyp tastaudy talap etıp, halyqaralyq qauymdastyqty Gaza sektoryndaǧy soǧys qimyldaryn toqtatuǧa şaqyrdy. Būl turaly memleket basşysynyŋ baspasöz qyzmetı jazdy, dep habarlaidy «Adyrna» tılşısı.
Prezident Qyrǧyzstannyŋ Resei men Ukraina arasyndaǧy qaqtyǧystyŋ saldaryn sezınıp jatqanyn mälımdedı. Aituynşa, bırjaqty sanksiialar elge kerı äserın tigızıp otyr.
«Qyrǧyzstan öz ekonomikasyn nyǧaituǧa barlyq küş-jıgerın jūmsap keledı. Sondyqtan bız negızsız sanksiialardy eldıŋ ışkı ısıne aralasu ärı älı qalyptasu kezeŋındegı ekonomikamyzdyŋ damuyna kedergı dep baǧalaimyz», – dedı Japarov.
Onyŋ pıkırınşe, qyrǧyz bankterıne qarsy sanksiialar keibır ükımettık emes ūiymdar men adal emes azamattar taratqan jalǧan aqparatqa negızdelgen. Prezident Qyrǧyzstan bankterınıŋ qyzmetın täuelsız halyqaralyq auditke şyǧaruǧa daiyn ekenın mälımdedı.
Sadyr Japarov Batys elderınıŋ ūstanymdaryndaǧy qarama-qaişylyqtarǧa da nazar audardy. Onyŋ sözınşe, olar Qyrǧyzstannan Reseimen yntymaqtaspauyn talap ete otyryp, özderı Mäskeumen sauda-ekonomikalyq bailanystaryn jalǧastyryp otyr.
«2024 jyly Europalyq Odaq elderı Reseimen 141 milliard dollarlyq sauda jasady. Al bızdıŋ ekı bankke sanksiia engızgen Ūlybritaniia sol jyly Reseimen 2,2 milliard dollar kölemınde sauda jürgızdı», – dedı Japarov naqty derekter keltırıp.
Memleket basşysy Qyrǧyzstandy Reseimen äldeqaida tereŋ ekonomikalyq bailanystar bailanystyratynyn, sondyqtan ekonomikalyq tūrǧydan Mäskeumen yntymaqtastyqtan bas tartu mümkın emestıgın atap öttı.
Sondai-aq Japarov Gaza sektoryndaǧy soǧys qimyldaryna da toqtaldy. Ol BŪŪ Bas hatşysynyŋ būl aumaqty «myŋdaǧan balalardyŋ ziraty» dep ataǧanyn eske salyp, «palestinalyqtarǧa qarsy jasalyp jatqan genosidtı toqtatudy jäne Halyqaralyq sot tarapynan halyqaralyq tergeudı bastaudy» talap ettı.
Prezident Qyrǧyzstan kez kelgen zorlyq-zombylyq pen terrorizmdı, sonyŋ ışınde 2023 jyldyŋ 7 qazanynda İzrailge jasalǧan teraktılerdı aiyptaitynyn atap öttı. Onyŋ aituynşa, terrorizmge qarsy küreste beibıt tūrǧyndardyŋ ömırı qiylmauy tiıs.
«Palestina-İzrail qaqtyǧysyn şeşudıŋ jalǧyz joly – «Ekı halyqqa ekı memleket» qaǧidatyn jüzege asyru»,– dedı prezident.
