Beisenbı künı ötken brifingte Pentagonnyŋ baspasöz hatşysynyŋ orynbasary Sabrina Singh Reseidıŋ 21 qaraşada Ukraina aumaǧyna orta qaşyqtyqtaǧy ballistikalyq zymyrandy (OQBZ) synaqtan ötkızgenın rastady, dep habarlaidy “Adyrna” ūlttyq portaly.
“Golos Ameriki” agenttıgı jariialaǧandai. Singhtıŋ aituynşa, būl zymyran Reseidıŋ qūrlyqaralyq ballistikalyq RS-26 «Rubej» modelınıŋ negızınde jasalǧan.
«Zymyran ūşyrylmas būryn qysqa uaqyt ışınde iadrolyq qauıp-qaterdı tömendetu arnalary arqyly aldyn ala habarlama aldyq», – dedı AQŞ Qorǧanys ministrlıgınıŋ ökılı.
«Būl ölımge äkeletın jaŋa türdegı qaru, ūrys alaŋynda qoldanyldy, sondyqtan būl, sözsız, alaŋdauşylyq tudyrady», – dep atap öttı Singh.
Ol būl orta qaşyqtyqtaǧy zymyrannyŋ kädımgı de, iadrolyq ta oqtūmsyqtardy alyp jüruge qabılettı ekenın aitty.
Beisenbı künı Vladimir Putin Reseidıŋ jaŋa «Oreşnik» ballistikalyq zymyranyn iadrosyz giperdybystyq jabdyqtauda qoldana otyryp, Dnepr qalasyndaǧy qorǧanys-önerkäsıptık keşen nysanyna soqqy jasaǧanyn mälımdedı. Al Ukraina prezidentı Vladimir Zelenskii bastapqyda Mäskeu ukrain aumaǧyna qūrlyqaralyq ballistikalyq zymyranmen soqqy jasady dep mälımdegen bolatyn.
Raketa jyldamdyǧy 10 mahqa deiın jetedı – būl sekundyna 2,5–3 şaqyrym, dep habarlaidy «Azattyq radiosynyŋ» reseilık basşynyŋ mälımdemesıne sılteme jasai otyryp. Putinnıŋ aituynşa, būl zymyrandy AQŞ pen Europada jasalatyn qazırgı zamanǧy äue qorǧanys jüielerı ūstap tūra almaidy.
Kremldıŋ mälımdeuınşe, būl ūşyrylym 19 jäne 21 qaraşada Ukraina Qaruly Küşterınıŋ Briansk jäne Kursk oblystaryndaǧy nysandarǧa soqqy jasaǧanyna jauap retınde bolǧan. Būl soqqylarda ATACMS jäne Storm Shadow (SCALP) siiaqty amerikalyq jäne europalyq öndırıstegı zymyrandar qoldanylǧany aitylady.
Eske sala keteiık, osy aptada AQŞ prezidentı Djo Baiden Ukrainaǧa Vaşingtonnyŋ eŋ ūzaq qaşyqtyqqa ūşatyn zymyrandary – ATACMS qoldanuǧa rūqsat bergen bolatyn. Sarapşylardyŋ pıkırınşe, būl amerikalyq zymyrandardy qoldanu Ukrainaǧa Kursk oblysyndaǧy şekara maŋyndaǧy aumaqty qorǧauǧa kömektesuı mümkın.
