Astanada 21 qańtarda brakonerler shabýylynan qaza tapty degen qoryqshy Erlan Nurǵalıevtiń serikteri men týystary jınalyp, bılik organdarynyń qoryqshy ólimine qatysty taratqan keıbir aqparatymen kelispeıtinderin málimdedi.
"Nomad" turǵynúı kesheniniń aldyna jınalǵandar polıııanyń qoryqshynyń ólimine qatysty taratqan keıbir málimetin joqqa shyǵardy. Ózin Erlan Nurǵalıevtiń kelinimin (inisi Nurlan Nurǵalıevtiń áıeli) dep tanystyrǵan Quralaı Álimovanyń aıtýynsha, shabýyl jasalǵan 13 qańtar kúni kúıeýine tanystary habarlasyp, aǵasynyń oqys jaǵdaıǵa ushyraǵanyn habarlaǵan.
- Kúıeýim 13 qańtar kúni keshke estip, saǵat 21-de (shabýyl bolǵan jerge - red) shyǵyp ketti, tańǵy saǵat 6-da Astanadaǵy aýrýhanaǵa aǵasyn ózi alyp bardy. Sol ýaqyt aralyǵynda jedel járdem, ne tikushaq jibermegen, - dedi Quralaı Álimova.
Ol ishki ister mınıstri Qalmuhanbet Qasymovtyń "14 qańtar kúni túske deıin tikushaq ushyrýǵa aýa-raıy qolaısyz boldy" degen sózin de joqqa shyǵardy.
Jınalǵandar ádette kıik atýǵa shyǵatyndar arasynda "mindetti túrde burynǵy polıııa ókilderi bolatynyn" aıtyp, "oqıǵaǵa kýá bolǵandardyń", ıaǵnı ekinshi kóliktegi adamdardyń kim ekenin jarııalaýdy talap etti. Ózin Erlan Nurǵalıevtiń joldasymyn dep tanystyrǵan Abzal Masabaev:
- Sol tórteýiniń famılııasyn nege aıtpaıdy? Sonyń ishinde bireýi burynǵy polıeı, biz bárin bilip otyrmyz. Kúdikti úsheýi bas-aıaǵy jeti adam bolǵan, tórteýi mine osyndaı dep moınyna alyp tur, - dedi.
Aýylsharýashylyǵy mınıstrligi 15 qańtarda Qaraǵandy oblysynyń Nura aýdanynda "Ohotzooprom" respýblıkalyq mekemesiniń ınspektory kıikter men sırek kezdesetin janýarlardy qorǵaý reıdi kezinde brakonerler qolynan aýyr jaralanyp, qaıtys bolǵany týraly aqparat taratqan. Mınıstrlik málimetinshe, 13 qańtarda keshke Toyota Land Cruiser kóligindegi belgisiz úsh adam olardyń izine túsken ınspektorlar Nıyk pen Nurǵalıevke qarsylyq tanytyp, shabýyldaǵan. Arada eki saǵattan astam ýaqyt ótkende polıııa men ınspektorlar shabýyldan jaralanǵan ınspektorlardy tapqan. Basynan aýyr jaralanǵan Erlan Nurǵalıev 14 qańtarda Astanadaǵy №1 qalalyq emhanaǵa jetkizilgen. Bir kúnnen artyq es-tússiz jatqan Nurǵalıev 15 qańtarda qaıtys bolǵan.
17 qańtar kúni jýrnalıster saýaldaryna jaýap bergen mınıstr Qalmuhanbet Qasymov "brakonerlerdiń eki kólikpen júrgenin, "qylmysty bir kóliktegi úsh adam jasaǵanyn" aıtqan. Onyń sózinshe, polıııa qylmysqa kúdiktilerdi ekinshi kóliktegi adamdar arqyly anyqtaǵan. Mınıstr "Jaraly qoryqshyny aýrýhanaǵa jedel jetkizýge ne sebepti tikushaq jiberilmedi?" degen saýalǵa "14 qańtar kúni túske deıin aýa-raıy ushýǵa qolaısyz boldy" dep jaýap bergen.
"Azattyq" radıosy
