استانادا 21 قاڭتاردا براكونەرلەر شابۋىلىنان قازا تاپتى دەگەن قورىقشى ەرلان نۇرعاليەۆتىڭ سەرىكتەرى مەن تۋىستارى جينالىپ، بيلىك ورگاندارىنىڭ قورىقشى ولىمىنە قاتىستى تاراتقان كەيبىر اقپاراتىمەن كەلىسپەيتىندەرىن مالىمدەدى.
"نوماد" تۇرعىنۇي كەشەنىنىڭ الدىنا جينالعاندار پوليتسيانىڭ قورىقشىنىڭ ولىمىنە قاتىستى تاراتقان كەيبىر مالىمەتىن جوققا شىعاردى. ءوزىن ەرلان نۇرعاليەۆتىڭ كەلىنىمىن ء(ىنىسى نۇرلان نۇرعاليەۆتىڭ ايەلى) دەپ تانىستىرعان قۇرالاي ءالىموۆانىڭ ايتۋىنشا، شابۋىل جاسالعان 13 قاڭتار كۇنى كۇيەۋىنە تانىستارى حابارلاسىپ، اعاسىنىڭ وقىس جاعدايعا ۇشىراعانىن حابارلاعان.
- كۇيەۋىم 13 قاڭتار كۇنى كەشكە ەستىپ، ساعات 21-دە (شابۋىل بولعان جەرگە - رەد) شىعىپ كەتتى، تاڭعى ساعات 6-دا استاناداعى اۋرۋحاناعا اعاسىن ءوزى الىپ باردى. سول ۋاقىت ارالىعىندا جەدەل جاردەم، نە تىكۇشاق جىبەرمەگەن، - دەدى قۇرالاي ءالىموۆا.
ول ىشكى ىستەر ءمينيسترى قالمۇحانبەت قاسىموۆتىڭ "14 قاڭتار كۇنى تۇسكە دەيىن تىكۇشاق ۇشىرۋعا اۋا-رايى قولايسىز بولدى" دەگەن ءسوزىن دە جوققا شىعاردى.
جينالعاندار ادەتتە كيىك اتۋعا شىعاتىندار اراسىندا "مىندەتتى تۇردە بۇرىنعى پوليتسيا وكىلدەرى بولاتىنىن" ايتىپ، "وقيعاعا كۋا بولعانداردىڭ", ياعني ەكىنشى كولىكتەگى ادامداردىڭ كىم ەكەنىن جاريالاۋدى تالاپ ەتتى. ءوزىن ەرلان نۇرعاليەۆتىڭ جولداسىمىن دەپ تانىستىرعان ابزال ماساباەۆ:
- سول تورتەۋىنىڭ فاميلياسىن نەگە ايتپايدى؟ سونىڭ ىشىندە بىرەۋى بۇرىنعى پوليتسەي، ءبىز ءبارىن ءبىلىپ وتىرمىز. كۇدىكتى ۇشەۋى باس-اياعى جەتى ادام بولعان، تورتەۋى مىنە وسىنداي دەپ موينىنا الىپ تۇر، - دەدى.
اۋىلشارۋاشىلىعى مينيسترلىگى 15 قاڭتاردا قاراعاندى وبلىسىنىڭ نۇرا اۋدانىندا "وحوتزووپروم" رەسپۋبليكالىق مەكەمەسىنىڭ ينسپەكتورى كيىكتەر مەن سيرەك كەزدەسەتىن جانۋارلاردى قورعاۋ رەيدى كەزىندە براكونەرلەر قولىنان اۋىر جارالانىپ، قايتىس بولعانى تۋرالى اقپارات تاراتقان. مينيسترلىك مالىمەتىنشە، 13 قاڭتاردا كەشكە Toyota Land Cruiser كولىگىندەگى بەلگىسىز ءۇش ادام ولاردىڭ ىزىنە تۇسكەن ينسپەكتورلار نيتسىك پەن نۇرعاليەۆكە قارسىلىق تانىتىپ، شابۋىلداعان. ارادا ەكى ساعاتتان استام ۋاقىت وتكەندە پوليتسيا مەن ينسپەكتورلار شابۋىلدان جارالانعان ينسپەكتورلاردى تاپقان. باسىنان اۋىر جارالانعان ەرلان نۇرعاليەۆ 14 قاڭتاردا استاناداعى №1 قالالىق ەمحاناعا جەتكىزىلگەن. ءبىر كۇننەن ارتىق ەس-ءتۇسسىز جاتقان نۇرعاليەۆ 15 قاڭتاردا قايتىس بولعان.
17 قاڭتار كۇنى جۋرناليستەر ساۋالدارىنا جاۋاپ بەرگەن مينيستر قالمۇحانبەت قاسىموۆ "براكونەرلەردىڭ ەكى كولىكپەن جۇرگەنىن، "قىلمىستى ءبىر كولىكتەگى ءۇش ادام جاساعانىن" ايتقان. ونىڭ سوزىنشە، پوليتسيا قىلمىسقا كۇدىكتىلەردى ەكىنشى كولىكتەگى ادامدار ارقىلى انىقتاعان. مينيستر "جارالى قورىقشىنى اۋرۋحاناعا جەدەل جەتكىزۋگە نە سەبەپتى تىكۇشاق جىبەرىلمەدى؟" دەگەن ساۋالعا "14 قاڭتار كۇنى تۇسكە دەيىن اۋا-رايى ۇشۋعا قولايسىز بولدى" دەپ جاۋاپ بەرگەن.
"ازاتتىق" راديوسى
