Ózbekstanda tabıǵı gaz tapshylyǵy baıqalýda. Bul týraly Qazaqstannyń munaı servıstik kompanııalary odaǵynyń bas dırektory Nurlan Jumaǵulov Facebook paraqshasyna jazdy, dep habarlaıdy “Adyrna” ulttyq portaly.
Bir kezderi gazǵa baı el búginde túrkimenstandyq jáne reseılik shıkizatqa táýeldi bolyp otyr.
“Jyl ótken saıyn ózbekstandyq gazdy Qytaıǵa eksporttaý qysqaryp keledi (Lýkoıl óndiretin Ózbekstandaǵy gazdy eksporttyq baǵa boıynsha satyp alýǵa májbúr). Ózbekstandaǵy kóptegen gaz jobasyn Gazprom burynnan baqylaýda ustap otyr. Al merdigerler reseılik Enter Engineering arqyly jetkizedi. Mysaly, Ózbekstannyń kómirsýtektik shıkizat óndirýdi ulǵaıtý boıynsha memlekettik baǵdarlamasynyń operatory 2017-2021 jyldary Gazprom bolsa, qarjylandyrý Gazprombank arqyly júzege asty”, - dep jazdy Qazaqstannyń munaı servıstik kompanııalary odaǵynyń bas dırektory Nurlan Jumaǵulov.
Onyń aıtýynsha, ózbekter qazir gaz-hımııa keshenin baqylaýda da qaýqarsyz.
“Ózbekter qazir Shýrtan gaz-hımııa keshenine (Mırzıeıoevtiń órshil jobasy) baqylaý júrgizýden de aıyrylyp qalýdyń aldynda tur. BMÓZ, FMÓZ, Gazlı GHM, avıaotyn men Tashkent jáne Tashkent oblysyndaǵy ushaqtarǵa janar-jaǵarmaı quıýdy jetkizýdi baqylaýdan aıyryldy. Shyn máninde, gaz salasy Gazpromnyń qolyna ótti deýge bolady. Al Lýkoıldyń úlesine ónimdi bólý týraly kelisimniń sharty boıynsha Ózbekstanda óndiriletin búkil gazdyń ¼ bóligi ǵana tıesili”, - dedi odaq basshysy.
