Ýkraına prezıdenti Vladımır Zelenskıı Ýkraına qarýly kúshteriniń alǵash ret eki Soltústik Koreıa áskerı qyzmetkerin tutqyndaǵanyn málimdedi, dep habarlaıdy "Adyrna" ulttyq portaly Euronews agenttigine silteme jasap.
Tutqyndar Kýrsk oblysynda ustalǵan. Zelenskııdiń aıtýynsha, jaraqat alǵan soltústikkoreıalyq sarbazdarǵa kómek kórsetilip, olar Kıevke jetkizilgen. Olar orys nemese aǵylshyn tilinde sóılemegendikten, olarmen sóılesýge aýdarmashylardyń kómegi qajet bolǵan.
Bir sarbazdy arnaıy operaııa kúshteriniń № 84 tobynyń jasaǵy tutqyndaǵan, al ekinshisin ýkraınalyq desantshylar ustaǵan.
«Bul mindet ońaı bolǵan joq. Sebebi ádette Reseı men Soltústik Koreıanyń basqa áskerıleri KHDR-diń Ýkraınaǵa qarsy soǵysqa qatysqany týraly dálelder saqtalmaýy úshin jaralanǵandaryn óltiretin», - dep málimdedi Zelenskıı.
Aqparattarǵa súıensek, tutqyndardyń birinde reseılik úlgidegi áskerı bılet bolǵan. Onda Týva respýblıkasynda tirkelgen basqa bir adamnyń aty-jóni jazylǵan. Tekserý barysynda ol 2005 jyly týǵanyn, 2021 jyldan bastap Soltústik Koreıada qyzmet etkenin jáne oqý úshin emes, Ýkraınaǵa qarsy soǵysqa qatysý úshin barǵanyn aıtqan.
Ekinshi tutqynda qujat bolmaǵan. Ol 1999 jyly týǵan, 2016 jyldan beri Soltústik Koreıanyń armııasynda snaıper-barlaýshy retinde qyzmet etetinin aıtqan.
