Májilis depýtaty Baqytbek Smaǵul premer-mınıstr Álıhan Smaıylovtyń atyna depýtattyq saýal joldap, Kenesary hannyń bas súıegin Astanadaǵy Ulttyq panteonǵa jerleýdi, al myltyqty Ulttyq mýzeıge tapsyrýdy usyndy, dep habarlaıdy “Adyrna” ulttyq portaly.
Depýtat byltyr Kenesary hannyń týǵanyna 220 jyl, al han bastaǵan kóteriliske 185 jyl tolǵanyn atap ótti.
“1837-1847 jyldardaǵy Kenesary bastaǵan ult-azattyq qozǵalys – qazaqtardyń otarshyldyqqa qarsy jappaı buqaralyq jáne uzaqqa sozylǵan kóterilisteriniń biri boldy. Ony patsha úkimeti de jeńe almady. Kenesary han qapyda qaza tapqan soń, qazaq handyǵy da joıyldy. Han Kene az ýaqytqa bolsa da úsh júzdi biriktirip, handyqty, ıaǵnı qazaqtyń memlekettiligin qalpyna keltire aldy. Kóptegen zertteýshi eldiń aýmaqtyq tutastyǵyn qalpyna keltirýdegi Kenesarynyń erekshe rólin atap ótti. Oǵan patsha ákimshiliginiń ókilderi de qurmetpen qarap, ony «Qazaq dalasynyń Mıtrıdaty», «erjúrek batyr» dep ataǵan», – delingen depýtattyq saýalda.
Ol qazir Kenesary hannyń bas súıegi men onyń myltyǵy Máskeýde etnografııalyq mýzeıde ýaqytsha saqtaýly turǵanyn da aıta ketti.
«2021 jyly geografııalyq qoǵam uıymdastyryp, Qazaqstannan arnaıy barǵan komıssııa jáne mamandar uly hannyń bas súıegi men myltyǵyn sáıkestendirý jumystarymen aınalysty. Tarıhı, antropologııalyq jáne muraǵattyq zertteýler kesheniniń qorytyndysynda myltyqtyń hanǵa 100% tıesili ekeni, al bas súıektiń Kenesary handiki ekeni (sáıkestik 90%-dan joǵary) anyqtaldy», – dedi ol odan ári.
Baqytbek Smaǵuldyń aıtýynsha, Kenesary hannyń bas súıegi men myltyǵy Reseıden Qazaqstanǵa qaıtarylsa, onyń súıegi Astanadaǵy Ulttyq panteonda jer qoınyna tapsyrylsa, al myltyǵy Ulttyq mýzeıge qoıylsa, ol el rýhynyń asqaqtaýyna, otanshyldyqtyń kúsheıýine jáne el astanasyndaǵy týrızmniń damýyna yqpal etedi.
