Astanada «AMANAT» partııasynyń qoldaýymen «Táýelsiz elim – tiregim!» respýblıkalyq aqyndar aıtysy ótti. Jyr alamany el egemendigi men ult tutastyǵyna arnaldy.
Aıtystyń ashylýynda «AMANAT»-tyń Atqarýshy hatshysy Ashat Oralov partııanyń uıytqy bolýymen bıyl birqatar respýblıkalyq aıtys uıymdastyrylǵanyn atap ótti. Sondaı-aq, partııa ulttyq mádenıet pen ónerdi damytýǵa únemi úlken úles qosyp kele jatqanyn jetkizdi.
«Táýelsizdikten baǵaly eshteńe joq. Sondyqtan, búgingi jyr dodasynyń jóni bólek. Aıtys – qazaqtyń boıtumary, ata-babalarymyzdan amanat bolyp jetken kıeli óner jádigeri. Ultymyzdyń rýhanııatyn, mádenıetin damytý men qoldaý isi bir sát te toqtamaıdy. Biz ulttyq ónerdi qoldaýdy aldaǵy ýaqytta da jalǵastyramyz», – dedi Ashat Oralov.
Aıtys tizginin ustaǵan aqyn, Májilis depýtaty Amanjol Áltaı dúbirli dodanyń máni men mańyzyna toqtalyp, qazylar alqasynyń quramyn jáne synǵa túsetin aqyndar qaýymyn tanystyrdy. Óz kezeginde, elimizdiń túkpir-túkpirinen Astana tórine at basyn burǵan 14 aqyn kóziqaraqty kórermenniń aldynda oramdy oı aıtyp, súbeli sóz órbitti.
Aqyndardyń jeti juby eń asyl qazynamyz sanalatyn azattyqtyń qadir-qasıetin jyrǵa qosty. Sóıtip, tús aýa bastalǵan sóz barymtasy qas qaraıǵansha jalǵasty. Soǵan qaramastan, qanǵa sińgen qasterli ónerdiń qadirin biletin aıtys súıer qaýym bir sátke bolsyn tarap ketken joq. Tapjylmaı tamashalady.
«Aıtys – aqsúıek óner. Búgin halyqtyń yqylasyna bólengen alaman uıymdastyryldy. «AMANAT» partııasy aldaǵy ýaqytta da rýhanııat pen mádenıetke, qazaqtyń bolmysyna, tiline, diline arnalǵan osyndaı is-sharalardy ótkizýdi jalǵastyrady dep senemin», – dep atap ótti qazylar alqasynyń tóraǵasy Ǵalym Jaılybaı.
Osylaısha, kórnekti aqyn, Abaı atyndaǵy memlekettik syılyqtyń laýreaty Ǵalym Jaılybaı bastaǵan qazylar quramynyń sheshimimen bas júldeni qyzylordalyq Meıirbek Sultanhan ıelendi. Al júldeli 1-oryn túrkistandyq Bekarys Shoıbekovke, 2-oryn ulytaýlyq Tólegen Jamanovqa buıyrdy. 3-oryndy aqtóbelik Nurbol Jaýynbaev, Abaı oblysynan kelgen Rústem Qaıyrtaıuly, kókshetaýlyq Nurmahan Jaqypbek jáne qostanaılyq Aıbek Qalıev ózara bólisti.
Saıysqa túsken barsha aqynǵa qomaqty syı-sııapat tabystaldy.
«Búgin elorda tórinde ulttyq ónerimiz ulyqtalyp, jyr jármeńkesi qanat jaıdy. Bul – aıtys óneriniń abyroıy asqaqtaǵan kún. Tól ónerimiz ǵasyrdan ǵasyrǵa jalǵasa berýine tilektespin. Jyr báıgesin joǵary deńgeıde uıymdastyrǵan el aǵalaryna, altyn ýaqytyn qıyp kelgen kórermenge alǵysym sheksiz. Táýelsizdigimizdiń tuǵyry bıik bolsyn. Elimiz máńgi jasasyn», – dedi jyr báıgesiniń jeńimpazy Meıirbek Sultanhan.
"Adyrna" ulttyq portaly
