Qazaqstannyŋ oŋtüstıgınde temırjol baǧytynda ırı keptelıs qalyptasty. Özbekstanǧa bet alǧan 11 myŋnan astam jük vagondary qozǧalyssyz tūr, dep habarlaidy "Adyrna" ūlttyq portaly.
Olardyŋ basym bölıgı astyq tasymaldaidy. Keibır poiyzdardyŋ kıdırısı 5–6 täulıkke deiın jetken.
Qozǧalys qiyndaǧan negızgı aumaqtar – Şeŋgeldı stansiiasy men Jylǧa jäne Darbaza beketterı.
«Qazaqstan temır joly» ūlttyq kompaniiasynyŋ mälımetınşe, poiyzdardyŋ uaqytyly qabyldanbauy saldarynan keste būzylǧan. Būl mäselege Özbekstan tarapynyŋ Saryaǧaş stansiiasyna keletın poiyzdardy keş qabyldauy sebep bolǧan.
Darbaza stansiiasynyŋ bastyǧy Ǧabit Süiınovtıŋ aituynşa, qabyldau mümkındıgınıŋ bolmauyna bailanysty jük poiyzdary uaqytşa osy beketke jıberıledı. Qazır vagondar küzetpen qamtamasyz etılıp, tranzittık jüktıŋ qozǧalys merzımınıŋ ötıp ketu qaupı tuyndap otyr.
Al «QTJ-Jük tasymaly» Şymkent bölımşesınıŋ direktory Nūrdäulet Baiǧaziev Özbekstan temırjolyna poiyzdardy qabyldau jäne öŋdeu jūmystaryn jedeldetu maqsatynda tehnikalyq kömek körsetılıp jatqanyn mälımdedı.
Keptelıstı azaitu üşın Saryaǧaş stansiiasynda vagondar täulık boiy qabyldanyp jatyr. Alaida mamandar mäselenı tübegeilı şeşu üşın keşendı şaralar qajet ekenın atap öttı.
Qazırgı taŋda Memleket basşysynyŋ tapsyrmasymen Darbaza–Maqtaral temırjol jelısınıŋ qūrylysy jürgızılude. Joba aiasynda bes jaŋa stansiia aşylyp, būl Saryaǧaş baǧytynyŋ jüktemesın 40 paiyzǧa tömendetıp, keptelıs mäselesın tolyq şeşuge mümkındık beredı dep josparlanǧan.
