Almaty qalasy, Túrkisib aýdany, Bakınskaıa kóshesindegi jeke turǵyn úıden órt shyqqan. Órt shyqqany týraly habarlama 2022 jylǵy 22 jeltoqsany, saǵat 13:51-de órt sóndirý qyzmetine jetken.
Aldymen úıdiń shatyry órtengen. Keıin jalyn kúsh alyp, janyndaǵy qorajaıǵa aýǵan.
Eń jaqyn bólimsheler órt ornyna habarlama túsken soń 4 mınýttan keıin jetti. Adam bar-joǵyn barlaý kezinde 1929 jyly týǵan ájeı qutqaryldy. Órt 14:15-te (kelgen sátten bastap 20 mınýtta) aýyzdyqtalyp, 14:27-de (kelgen sátten 32 mınýttan soń) sóndirildi, - dedi Almaty qalasy tótenshe jaǵdaılar departamentiniń baspasóz qyzmeti.
Beıbit kúnniń batyrlary - Asylhan Turan, Sanjar Taısarıev, Nurjan Janqurazov.
4-mamandandyrylǵan órt sóndirý bóliminiń qaraýyl bastyǵy, bas ınjener Asylhan Turan terezeni shaǵyp jatqanda, kómekke kelgen órt sóndirý bóliminiń komandıri Sanjar Taısarıev pen órt sóndirýshi-qutqarýshy Nurjan Janqurazov esikti buzyp, úıge kiredi. Qulyptaýly bólmede órttiń bolyp jatqanynan beıhabar qart kisini kórgen.
Asylhan Turan, Sanjar Taısarıev pen Nurjan Janqurazov ájeıdi syrtqa shyǵaryp, jedel járdem qyzmetine tapsyrdy.
"Adyrna" ulttyq portaly