Arqankergen shekara beketinde 15 adamdy óltirdi degen aıyppen 2012 jyly ómir boıyna sottalǵan Vladıslav Chelah Qazaqstan prezıdenti Qasym-Jomart Toqaevqa hat jazdy, dep habarlaıdy “Adyrna” tilshisi Azattyq radıosyna silteme jasap.
Chelah Toqaevtan tergeý proesin qaıta bastap, ózinen "jalǵyz kýáger retinde" jaýap alýdy suraıdy.
"Qurmetti prezıdent, kóp jyl ótse de qaıǵyly oqıǵa jaıly qaıta aıtýǵa daıynmyn. Meniń bar surarym, meni tyńdap, maǵan múmkindik berseńizder. Qalaı bolǵanyn aıtqym keledi jáne bárin aıtýǵa daıynmyn. Tergeýshilerge de bárin aıtýǵa daıynmyn. Oqıǵanyń qalaı bolǵany sol kúıi ashylmaı qaldy" dep jazǵan Chelah prezıdentke hatynda.
Ol hatynda shekara beketine "shabýyl jasalǵany jaıly" jazǵan, sondaı-aq, sot kezinde de osy nusqany aıtqanymen, sot onyń sózin qarastyrmaǵan.
Túrmeden jazylǵan hatty Azattyqqa Chelahtyń týystary berdi. Jaqyndarynyń sózinshe, Chelah hatyn prezıdentke elektrondy túrde jibergen. Hat qańtarda qaralatyny kórsetilgen.
Chelah prezıdentke qaıyrylǵan hatynda "jasamaǵan qylmysy úshin" ómir boıyna qamalǵanyn jazady. Ol BUU Adam quqyǵy komıtetiniń Qazaqstan bıligin Chelahqa qorǵanýǵa múmkindik jasaýdy usynǵan sheshimin de eske salǵan.
2012 jyly 30 mamyrda Almaty oblysyndaǵy Arqankergen shekara beketiniń órtengen ornynan 14 shekarashy men bir qoryqshynyń máıiti tabylǵan. Tiri qalǵan jalǵyz shekarashy Vladıslav Chelahtyń ústinen qylmystyq is qozǵalyp, 2012 jylǵy jeltoqsanda sot ony ómir boıy bas bostandyǵynan aıyrǵan.
Chelahqa Qylmystyq kodekstiń "Eki jáne odan kóp adamdy óltirý", "Jeke zattardy urlaý", "Qupııa qujattardy urlaý", "Qarý urlaý" jáne "Zańsyz qarý ustap júrý" tárizdi barlyǵy toǵyz bap boıynsha aıyp taǵylǵan.
2017 jyly qarashada BUU-nyń Adam quqyǵy komıteti Qazaqstannyń Azamattyq jáne saıası quqyqtar týraly halyqaralyq paktiniń 14-babyn buzyp, Chelahty óz isin "ádil jáne beıtarap sotta qaraý quqyǵynan aıyrdy" degen uıǵarym shyǵarǵan. Komıtetke shaǵymdy onyń advokaty Serik Sársenov (ol 2018 jyly naýryzda qaıtys bolǵan) daıyndaǵan.
Keıingi 10 jylda qoǵamda Arqankergen oqıǵasyna qatysty syrttan shabýyl, kontrabandıster, terrorıstik top sııaqty ártúrli boljamdar aıtylǵan. Tipti bul qantógisti kúsh qurylymdary arasyndaǵy básekemen baılanystyrǵandar da bolǵan. Ol kezde (28 mamyr – Shekarashylar kúni) zastavaǵa jaqyn mańdaǵy ańshylyq sharýashylyǵyna joǵary shendi tulǵalar demalysqa barǵan, olardyń arasynda kıkiljiń týyp, onyń sońy qantógiske ulasqan degen nusqa da bar.
