Nursultan Nazarbaevtyń nemere inisi Qaırat Satybaldynyń qaı kolonııada jazasyn óteıtini belgili boldy. Bul týraly YEDILOV ONLINE telegram-arnasy jarııalady, dep habarlaıdy “Adyrna” ulttyq portaly.
“Qaırat Satybaldyuly ShQO-daǵy № 22 kolonııaǵa aýystyryldy. Bul arnaıy jáne quqyq qorǵaý organdarynyń burynǵy qyzmetkerlerine arnalǵan kolonııa. Derekkózder Qaırat Satybaldyulynyń osy kolonııaǵa jetkizilgenin, sot úkimimen 6 jyl jazasyn óteıtinin habarlady”, – delingen jazbada.
Astana soty Qaırat Satybaldyulynyń tergeý ızolıatorynan bosatylǵanyn rastady.
"Qaırat Satybaldyulyna qatysty úkim 20 qazanda zańdy kúshine endi. Ol Shyǵys Qazaqstan oblysy boıynsha Qylmystyq-atqarý júıesi departamentiniń №22 mekemesinde jazasyn ótep jatyr", – delingen Astana qalalyq sotynyń baspasóz qyzmetiniń habarlamasynda.
Eske salaıyq, 26 qyrkúıek kúni Astanada Baıqońyr aýdanynyń №2 sotynyń sýdıasy Qaırat Satybaldyǵa qatysty sońǵy úkimdi oqydy. Sot Satybaldyny 6 jylǵa bas bostandyǵynan aıyrǵan bolatyn.
Sot úkimin sýdıa Nurlan Baıahmetov oqydy. Satybaldyny Sybaılas jemqorlyqqa qarsy agenttik qyzmetkerleri “Qazaqtelekom” AQ-nyń asa iri kólemdegi qarjysyn jymqyrý jáne qyzmetin asyra paıdalaný faktisi boıynsha ustaǵan.
Buǵan deıingi sot otyrysynda Qaırat Satybaldy mıllıardtaǵan dollardy jymqyrǵanyn tolyq moıyndap, jasaǵan isine ókinetinin aıtqan.
Ol 6 jylǵa bas bostandyǵynan aıyrý jazasyn ortasha rejımdegi túzeý kolonııasynda óteý jazasyna kesildi. Sondaı-aq ol 10 jyl boıy memlekettik qyzmette jumys isteı almaıdy.
Prokýror Jangeldi Esebaev Satybaldyny alty jylǵa bas bostandyǵynan aıyrýdy surady. Sondaı-aq ol aıyptalýshyny "Qurmet", "Parasat" ordenderinen aıyrýdy da talap etken.
2022 jylǵy 13 naýryzdan bastap úkim zańdy kúshine engenge deıin qamaýǵa alynǵan kún jazany óteýdiń 1,5 táýligi bolyp esepteledi.
Sonymen qatar, Marat Muhambetjanuly men Ǵaını Beketov alty jylǵa shartty túrde bas bostandyǵynan aıyrý jazasyna kesildi.
Al Shyńǵys Qońyrbaev pen Leonıd Mýravevke 2,5 jylǵa shartty túrde bas bostandyǵynan aıyrý jazasy taǵaıyndaldy.
Odan bólek, Satybaldy men basqa da tulǵalarǵa qatysty salyqty jáne bıýdjetke tólenetin basqa da mindetti tólemderdi tóleýden jaltarý, sondaı-aq qylmystyq jolmen alynǵan aqshany jáne ózge de múlikti zańdastyrý faktileri boıynsha sotqa deıingi tergeý amaldary júrgizilip jatyr. Sol sebepti Qaırat Satybaldydan sot aldynda aldaǵy ýaqytta da jaýap alynady.
