Qaraly habardy QR Jazýshylar odaǵy basqarmasynyń tóraǵasy Ulyqbek Esdáýlet jetkizdi. Aqyn óziniń Facebook-tegi paraqshasynda:
"...Astanadan tań bozymen taǵy bir aýyr habar jetti - arqaly aqyn Qonysbaı Ábil dúnıeden ótipti! Jalǵan-aı!.. Qazaqstannyń Halyq aqyny, ataqty aıtysker, alty Alashtyń ardaqtysy, sóz súleıi, saıypqyran satırık, qarymdy qalamger, til janashyry, ot aýyzdy, oraq tildi, segiz qyrly, bir syrly asyl azamat bul pánıden baqıǵa kóshipti! Kókiregim qars aıyryla otyryp, marqumnyń otbasyna, aıaýly aqynyn qadirleıtin halqymyzǵa kóńil aıtamyn. Baqul bol, dosym! Janyń jannatta bolsyn!" - dep jazdy.
Oqyrmanǵa Qonysbaı Ábil haqqynda ǵumyr-derek usynamyz.
Qonysbaı Ábil 1954 jyly 21 mamyrda Qostanaı oblysy, Jangeldi aýdanynda dúnıege kelgen.
QazMUÝ, jýrnalıstıka fakýltetiniń túlegi. Kezindegi "Lenınshil jas" (qazirgi "Jas Alash") gazetiniń Torǵaı, elınograd oblystary boıynsha menshikti tilshisi bolǵan. Odan bólek "Torǵaı tańy", "Arqalyq tańy" gazetterinde basshylyq qyzmet atqardy. Torǵaı oblystyq teleradıo kompanııasynyń tóraǵasy bolǵan. "Qazaqstan aıtys aqyndary men jyrshylar odaǵyna" tizgindik etken. Túrli deńgeıde til saıasatyna atsalysqan bilikti maman. Sonymen qatar ol ultymyzdyń umyt bola jazdaǵan uly óneri – aqyndar aıtysynyń halqymyzǵa qaıta oralýyna, onyń órkendep damýyna qomaqty úles qosqan aldyńǵy qatardaǵy lektiń ókili.
"Adyrna" ujymy qazaqtyń aıboz aqynynyń otbasyna, oqyrmandaryna, shákirtteri men jora-joldastaryna qaıǵyra otyryp kóńil aıtady.
"Adyrna" ulttyq portaly
