«Adyrna» ulttyq-etnografııalyq birlestigi Almaty qalasy Din isteri jónindegi basqarmanyń qoldaýymen Almaty qalasyndaǵy Jazýshylar odaǵynyń konerttik zalynda úlken de qýanyshty jıyn ótkizdi. Bul jıyn barysynda qazaq rýhy aspanǵa áýeleı kóterilgen sátter az bolǵan joq.
Bul qandaı jıyn edi deısizder ǵoı? Bul jaı jıyn emes! Bul qazaq ániniń asqaqtaǵan keshi boldy!
Kesh bolǵanda da jaı kesh emes, án keshi!
Án bolǵanda, mahabbat ánuranyna aınalǵan «Qorlan» ánin shyǵarǵan Estaı Berkimbaıulynyń týǵanyna 150 jyl tolýyna arnalǵan toı boldy deýge laıyqty kesh boldy. Sahnany bezendirip turǵan qazaq oıýlarynyń ortasynan oryn alǵan qazaqtyń dombyrasynyń sýretiniń janynda jazylǵan búkil qazaqqa belgili Estaıdyń aty jazylǵan edi.
Qazaq ánin saǵynyp qalǵan kópshilik, ásirese jastar zalǵa tez jınalyp ánshilerdiń sahnaǵa shyǵýyn taǵatsyzdana kútip otyrdy. Buny olardyń jıi-jıi qol shapalaqtap konerttiń bastalýyn talap etkenderinen bilýge bolatyn edi.
Mine, kópten kútken án keshi de bastaldy. Konertti júrgizýshi ónertanýshy Erlan Tóleýtaı Estaı týraly qyzyqty tarıhı derekterge súıene otyryp, keremet málimetterdi keltire otyryp keshti jaqsy júrgizdi. Sahnaǵa shyǵatyn ánshilerdi tanystyrýda da múlt ketken jeri bolǵan joq.
Estaıdyń ánderi birinen soń biri oryndalyp tyńdaýshylardy armanǵa toly sezimge bólep tátti qııal álemine jetelep alyp ketkendeı edi. Kórermen ár ánshini qalaı qoshmettep qarsy alsa, ónerlerine rıza bola otyryp sondaı qoshemetpen qol shapalaqtaı shyǵaryp salyp otyrdy.
Bul án keshinde ózin ǵashyq bolǵan Estaıdaı sezinbegen jigit, ózin Qorlandaı sezinbegen qyz qalmady dep aıtsaq esh qatelespeımiz.
Bul kesh shyn máninde án keshi boldy! Al endi osy keshke kelip kórermenniń júregine jetkize án aıtqan ánshiler – Jolaman Qujımanov, Erkin Shúkmanov, Nurjan Janpeıisov, Erlan Tóleýtaı, Tileýles Qurmanǵalıev, Amangeldi Kúzeýbaev, Talǵat Ábýǵazy, Jasulan Saqaev, Qanat Ámirhanov, Saıan Bódesov, Dıana Kósherbaı, Jandáýren Silámǵalı, Birjan Aıtahmetov, Jandos Syzdyqov, Ádiljan Amanjol.
Keshke jınalǵan kórermen qaýym osy esimderdi júregine jaqyn tutyp jattap alǵany sózsiz.
Ánshiler ataqty, laýazymdy dep bólingen joq. Júrgizýshi aıtqandaı osy án meıramynda óner kórsetkenderdiń bári Estaı aqynnyń nemereleri men shóbereleri edi. Sol ataqqa laıyqty ánshi-dombyrashylar edi.
Shyndyǵyn aıtqanda osy kesh barysynda, adamdy tek óner adamdary, onyń ishinde tek qazaqtyń qara dombyrasymen qosylyp án shyrqaıtyn jandar ǵana baqytty ete alady eken-aý degen oı kelgeni de ras! Osy kesh osyny dáleldegendeı!
Mine, sahnaǵa ánshilerdiń bári shyqty. Bul shynynda da keremet kórinisedi. Rıza bolǵan kórermen, osy sherýdi bastap Estaıdyń ózi sahnaǵa shyqqandaı sezimde bolyp qol shapalaqtady.
Kesh sońynda «Adyrna» ulttyq-etnografııalyq birlestiginiń basshysy Arman Áýbákir osy án keshine belsene qatysqan ánshilerge, altyn ýaqytyn qıyp kelgenderge alǵysyn jetkizdi.
Án keshine jınalǵan jurtshylyq tez tarqaı qoımady. Biraq bastalǵan ár isiń aıaqtalatyny da shyndyq. Júrekteri jylylyqqa tolǵan kórermen, dalaǵa shyqqanda jeltoqsannyń sýyǵyn elegen joq. Estaıdyń ánderiniń umytylmas áýenderi Almaty keshiniń aspanynda qanatyn keń jaıǵan qustarsha asqaqtaı qalyqtap bara jatty.
Berdaly OSPAN
