Prezıdent mektepterdegi qaýipsizdikti kúsheıtý týraly Úkimetke tapsyrma bergen. Osydan keıin elimizdegi biraz mektepte mamandandyrylǵan kúzet engizilip, kireberiste týrnıketter ornatyldy, dep habarlaıdy «Adyrna» tilshisi.
Esterińizge salamyz, Memleket basshysy Ulttyq qoǵamdyq senim keńesinińVI otyrysynda osy ózekti máselege qaıta oralǵan edi.
"Mektepterde, kolledjder men JOO-larda qaýipsizdikti saqtaý ózekti másele bolyp tur. Biz oqýshylar men stýdentterdi kez kelgen qaýip-qaterden qorǵaýǵa tıispiz. Bilim berý mekemelerindegi qaýipsizdik júıesine biryńǵaı talap qoıylýy qajet. Sol úshin bárine ortaq ereje ázirleý kerek", – dedi Qasym-Jomart Toqaev.
Prezıdenttiń bul tapsyrmasy Almaty qalasynda júıeli túrde oryndalýda. Bul týraly shahar basshysy Erbolat Dosaev aıtty.
Ákimniń sózine súıensek, 2023 jyldan bastap jalpy bilim beretin mektepterde týrnıket, dabyl túımeleri men beınebaqylaý júıesi ornatylatyn bolady.
«Memlekettik mektepter úshin úsh elementti qamtıtyn baǵdarlama ázirlenedi: dabyl túımesi, týrnıket jáne beınebaqylaý júıesi. Jekemenshik mektepter ózin-ózi qamtamasyz etýi kerek. Memlekettik mektepter úshin baǵdarlama usynylady. 2023 jyly iske asyra bastaımyz», - dedi Erbolat Dosaev.
Aıta keteıik, búgingi kúni qaladaǵy bilim uıalaryndaǵy qaýipsizdikti qamtamasyz eti maqsatynda beıne baqylaý qondyrǵysy ornatylǵan. Qazirgi kezde bilim berý nysandarynda 11 979 kamera, mektepke deıingi mekemelerde 6 132 kamera jumys istep tur.
