"Astanada oqýshy ornynyń tapshylyǵy 26 myńnan asady". Bul týraly QR Oqý-aǵartý mınıstri Ashat Aımaǵambetov habarlady, dep jazady "Adyrna" ulttyq portaly jazady.
"Elorda mańynda ornalasqan «Lesozavod» aýdanyndaǵy №49 mektepke bardym. Munda 1 300-den astam bala oqıdy. Mekteptegi qaýipsizdikti qamtamasyz etý boıynsha jumystarmen tanysyp, oqý kabınetterin araladym, kitaphanada oqýshylarmen jáne kitaphanashymen áńgimelestim. Sondaı-aq áriptesterimmen jumys máselelerin talqyladyq", - dep jazdy mınıstr.
Mınıstr «Jaıly mektep» ulttyq jobasy aıasynda jańa mektepter salynatynyna toqtalyp ótti.
"Astanadaǵy bilim basqarmasynyń mektepterde oqýshylar saraıynyń fılıaldary men basqa da qosymsha bilim berý uıymdaryn ashý boıynsha oń tájirıbesin atap ótkim keledi. Mysaly, bul mektepte avıamodeldeý, boks, voleıbol jáne t.b. úıirmeler jumys isteıdi. «Jaıly mektep» ulttyq jobasyn iske asyrý aıasynda jańa mektepter salý josparlanyp otyrǵan birneshe orynǵa bardyq. Bul Kereı jáne Jánibek handar kóshesindegi (árqaısysy 2 000 oqýshy orny), Tóle bı kóshesindegi (2 000 oqýshy orny) jáne Baıtursynov 7 kóshesindegi (600 oqýshy orny) mektepter", - deıdi mınıstr.
Aımaǵambetovtiń aıtýynsha, elordada oqýshy ornynyń tapshylyǵy 26 myńnan asady.
"Qazir qalada oqýshy ornynyń tapshylyǵy 26 myńnan asady. Bul máseleni sheshý úshin 2024-2025 jyldarǵa arnalǵan ulttyq joba sheńberinde ekiaýysymda 85 myńǵa jýyq oqýshy ornyn qamtamasyz etetin 24 mekteptiń qurylysyn aıaqtaý josparlanǵan. Basym kópshiligi 2024 salynyp bitedi. Ulttyq jobany iske asyrýǵa jetekshilik etetin Astana ákimdiginiń ókilderi jer ýchaskelerin bólý, JSQ daıyndaý, ınjenerlik ınfraqurylym jáne t.b. máselelerdi sheship jatqanyn atap ketkim keledi. Bolashaqta elordada bilim berý obektilerin salý úshin 102 jer ýchaskesin bólý jónindegi sheshim de ýaqytyly qabyldandy. Prezıdenttiń jańa ulttyq jobany iske asyrý jónindegi tapsyrmasy aıasynda aldaǵy ýaqytta úshaýysymdy oqytý máselesi ǵana emes, oqýshy oryndarynyń tapshylyǵy da tolyq sheshiledi", - deıdi Aımaǵambetov.
"Adyrna" ulttyq portaly
