Sheteldik qazaqtardy qoldaý alqasy Toqaevqa sheteldegi qazaqtardy elge qaıtarý týraly úndeý joldady

3059
Adyrna.kz Telegram
Foto: ritmeurasia.org
Foto: ritmeurasia.org

Sheteldik qazaqtardy qoldaý alqasy Prezıdent Qasym-Jomart Toqaevqa sheteldegi qazaqtardy elge qaıtarý týrasyndaǵy úndeý joldady, dep habarlaıdy “Adyrna” ulttyq portaly.

Úndeý mátinin jarııalaýdy jón kórdik:

QR Prezıdenti Q.K.Toqaevqa Sheteldegi qazaqtardy elge qaıtarý týrasyndaǵy úndeý

Qurmetti Qasym-Jomart Kemeluly!

2022 jyl Qazaqstan úshin túrli demografııalyq oqıǵalarǵa toly bolyp otyr. Onyń bir naqty kórinisi - sońǵy aptadaǵy Reseı basshylyǵynyń azamattardy Ýkraınamen aradaǵy soǵysqa jumyldyrý boıynsha sheshimine baılanysty sol eldiń azamattarynyń shetelge, sonyń ishinde Qazaqstanǵa qaraı bosýy. Árıne, halyqaralyq uıǵarym boıynsha adam quqyǵyn qorǵaý jolyndaǵy mindetimizge qaraı reseılikterdi qabyldaýymyz jón. Biraq bunyń eldiń ishki qoǵamdyq-saıası ahýalyna keraǵar tusyn aıtpaǵannyń ózinde, demografııalyq áljýazdyǵymyzdy odan saıyn órshite túsetindigin táýelsiz memleket retinde eskerýge tıispiz.

Eldiń tarıhynda HH ǵasyrdyń 20-30 jyldary qazaq halqynyń tarapyna Sovettik ókimet jasaǵan Asharshylyq pen qýǵyn-súrgin qyrǵyny kesirinen myńdaǵan qazaqtar bala-shaǵasymen shetelge bosqany málim. Aman jetken solardyń búgingi urpaqtary áýeli Qytaı men Aýǵanstan elderine, odan ári Pákstan, Saýd Arabııasy, Iran, Túrkııa taǵy basqa shetelderge aýýǵa májbúr boldy. Bulardyń búgingi urpaǵyn elge qaıtarýǵa tarıhı otany retinde Qazaqstan áli kúnge naqty sheshim qabyldaǵan joq jáne júıeli joba men baǵdarlamany iske asyrǵan emes. Osynyń kesirinen qazaqtardyń taǵy da óziniń tarıhı otanynda azshylyqqa ushyraý qateri týyndady. Al sheteldegi qandas baýyrlardyń jas urpaǵy sol elderge sińip ketý úderisi júrip jatyr.

Sońǵy 30 jyl boıǵy bastalǵan bul saladaǵy jumys júıesiz jáne kórnekilikke ǵana qurylǵan, paraqorlyq pen jemqorlyq jaılaǵan salanyń birine aınaldy. Buǵan deıingi istelgen repatrıaııa júıesiz, júrdim-bardym jasalǵan sharalar.Elge kelýge, tipti eshbir jaǵdaı suramaýǵa peıil bildirgen qandastar, ásirese Aýǵanstanda qalǵan, týystary elge oralyp úlgergen azamattardyń qazaq ekendigine kúmánmen qaraıtyn jeleý buǵan jol bermeı otyr. Áli kúnge «qandas» mártebesin berýge jatatyn sheteldegi qazaqtardy moıyndaý erejesi bekitilmegen!

Sheteldik qazaqtar tarapyna tarıhı otany retinde Qazaqstannan beriletin vıza máselesi, gýmanıtarlyq kómek pen aǵartý salasy boıynsha jumystar eshqandaı jolǵa qoıylmaǵan. «Dúnıejúzi qazaqtarynyń qaýymdastyǵy» atalatyn uıymnyń jumysy múldem syn kótermeıdi.

Qurmetti Prezıdent!
Egemen elimizdiń aldynda demografııalyq turǵydan úlken synaq kútip tur. Eldiń demografııalyq ahýaly - memlekettiń qaýipsizdigi men halyqtyń amandyǵyna jáne onyń damýyna tikeleı qatysy bar basty faktordyń biri retinde tez arada memlekettik sheshim qabyldaýǵa jatatyn másele. Osyǵan sáıkes Sizden tyńǵylyqty sheshim kútemiz!

Sheteldik qazaqtardy qoldaý alqasy.
30 qyrkúıek 2022 jyl.

Qurmetpen Sheteldegi qazaqtardy qoldaý Alqasynyń músheleri:

Serik Erǵalı (Astana), Dos Kóshim (Almaty), Qydyráli Oraz (Uly Brıtanııa, London), Beısen Ahmetuly (Astana),Aqpar Aıýbı (Danııa), Abdýlla, Amıdýlla Tadash (Aýǵanstan, Qabýl), Hamıd (Pakıstan, Karachı), Ahmad Qojabaev (Saýd Arabııa, Mekke), Mohammad Tabyn (Aýǵanstan), Seıfolla (Iran, Gorgan), Jora Tabyn (Iran), Madjanov Qalıolla Aıhojauly (Shymkent), Jumat Gazız (Semeı), Jarqynbek Seıtimbet (Shymkent), Baýyrjan Berdibaıuly (Jańaózen), Sadýaqasova Aqmaral Qaıyrbekqyzy (Astana), Sultanbek Tashkenbaı (Aqtóbe), Ermek Eshmuhanbetuly (Taldyqorǵan), Bekarystan Myrzabaı (Aqtóbe), Jakeb (Almaty), Talǵat Musaqululy (Jambyl oblysy Jýaly aýdany), Esentúgel Eleýken (Astana), Dáýren Qýat (Almaty), Aıatjan Ahmetjan (Astana), Kýldarıǵa Rom (Pavlodar), Berkalıeva Kúlıman Abdygalıevna (Almaty oblysy) taǵy basqalar.

Pikirler