Zashaǵan kentinde 160 oryndyq bóbekjaı jumysyn bastady. «Qala kúni» merekesimen tuspa-tus ótken bóbekjaıdyń ashylý saltanatyna qala ákimi Mırjan Satqanov qatysyp, quttyqtaý lebizin bildirdi.
– Búgingi kúni qalamyzdaǵy 157 mektepke deıingi uıymda 18 myńdaı búldirshin tárbıelenýde. 3-6 jas aralyǵyndaǵy mektep jasyna deıingi balalar 100 paıyz balabaqshamen qamtyldy. Zashaǵan kenti shahardaǵy halyq tyǵyz ornalasqan aýdan. Turǵyndar sany jyldan jylǵa artyp keledi. Sondyqtan áleýmettik nysandardyń salynýy mańyzdy. Osy iste jeke kásipkerlerdiń belsendiligi qýantady. Zamanaýı úlgide jańa balabaqshany ashýda bastamashy bolǵan azamattarǵa alǵysymyzdy bildiremiz. Balabaqshanyń ashylýy, «Qala kúni» qutty bolsyn, – dedi qala basshysy Mırjan Munaıdaruly.
Saltanatty sharaǵa qatysqan ata-analar, meımandar da ózi tilekterin bildirdi.
Zashaǵan halyq sany kóbeıip, jyldan jylǵa úlkeıip kele jatqan kent. Búginde osy aýdandaǵy 7 memlekettik, 15 jeke balabaqsha men mektep janyndaǵy shaǵyn ortalyqtarda 3200-deı búldirshin tárbıelenýde.
Zamanaýı úlgide salynǵan «Aıana» balabaqshasynyń ashylýymen taǵy 160 bala mektepke deıingi uıymmen qamtylatyn bolady.
Tıptik úlgidegi eki qabatty bóbekjaı ǵımaratynyń aýmaǵy 3210 sharshy metr. Jalpy aýmaǵy – 5850 sharshy metr. Oqý-tárbıe jumysy memlekettik tilde júrgiziledi. Balalardyń alańsyz oınap, jan-jaqty bolyp qalyptasýy úshin barlyq jaǵdaı jasalǵan. Medıınalyq bólim, ashana, akt zaly, psıholog, úıirme, oıyn bólmeleri zamanǵa saı qajetti jabdyqtarmen qamtylǵan. Aýlada ár top úshin oıyn alańdary daıyndalǵan.
