Almaty qalasy Ishki saıasat basqarmasynyń qoldaýymen qolǵa alynǵan «Azamattyq borysh» jobasy aıasynda 13 qyrkúıek kúni Temir jol koldledjinde Aýǵan soǵysy ardagerlerimen kezdesý ótti. Sharaǵa ardagerlerden Arǵynbek Esimhanuly, Baıdáýlet Qurmanqojauly, Ádil Bektasuly qatarly soǵys kýágerleri qatysty. Ardagerlermen emen-jarqyn áńgime quryp, estelikter tyńdaǵan stýdentter: «Aýǵan soǵysynyń ardagerleri, biz sizderdi jaqsy kóremiz. Sizderge jasymas jiger tileımin. Soǵys bolmasyn, aman bolyńyzdar!» - degen aqjarma tilekterin bildirdi. Sondaı-aq, «Keńes áskeriniń Aýǵan jerinen shyǵarylǵanyna tabany kúrekteı 29 jyl ótipti. Alaıda sol soǵystyń zardaby eshkimniń júreginen óshken joq, ol jara jazylmaıdy. Qazirgi sátte bizdiń júzimiz jarqyn kóringenimen, ár ardagerdiń júrekteri jylap tur. Qaza bolǵan maıdandas dostaryńyzdyń beınesi eshýaqytta sanadan óshpeıtinin bilemiz. Endigi bizdiń armanymyz, tilegimiz keıingi urpaq mundaı qyrǵyndy kórmesin, elimiz aman, jurtymyz tynysh bolsyn osyndaı máni zor júzdesýdi ótkizýge uıytqy bolǵan «Adyrna» birlestigine alǵys bildiremin» - desti. Al ardagerler bolsa: «Árıne, Aýǵan soǵysynyń salǵan zardaby, qaıǵysy men qasireti eshqashan umytylmaq emes. Jyl saıyn aqpanda osylaı bas qosyp, áńgimelesip, sher tarqatyp alamyz. Sol úshin bárińizge rahmet. Qatarymyz sıremeı aman-esen osylaı jolyǵyp júreıik. Osynda jınalyp, bizdiń áńgimemizge qulaq asqan jastarǵa, uıymdastyrýshylarǵa alǵys aıtamyz» - dep tarqasty.
1979 jyly 25 jeltoqsanda Keńes Odaǵy «Aýǵanstan eline ınternaıonaldyq kórsetemiz» degen jeleýmen onyń qarýly kúshterin sol eldegi azamattyq soǵysqa qatystyryp jáne keń kólemde áskerı is-qımyldar júrgizdi. «Taýlar alystaǵan saıyn, bıikteı túsedi», degendeı, qansha ýaqyt ótse de bul kún mańyzyn joǵaltqan emes.
