Dintanýshy Turarbek Qusaıynuly Memleket basshysy Qasym-Jomart Toqaevqa úndeý jarııalady, dep habarlaıdy «Adyrna» tilshisi.
«Qazaqstanda dinı ekstremızm jáne terrorızmmen kúres jónindegi memlekettik baǵdarlamany júzege asyrý úshin 2013-2017 jyldar aralyǵynda 200 mlrd.teńge jumsalǵan eken. Ol ýaqytta Kárim Másimov premer-mınıstr edi. Al endi Kárim Másimov ulttyq qaýipsizdik komıtetine jetekshilik etken, ıaǵnı 2019-2021 jyldar aralyǵynda ekstremızm men terrorızmge qarsy 100 mıllıardtan astam qarjy bólindi.
Mysaly Túrkııadaǵy Bekbolat Tileýhan jýrnalıst Nartaı Aralbaıulyna bergen suhbatynda memleketke opazdyq jasaý, bılikti kúshpen basyp alý jáne laýazymdyq mindetterin asyra paıdalandy dep aıyp taǵylǵan Kárim Másimovtiń saıasatker retinde erekshe qasıetin baǵalap, jer-kókke syıǵyzbaı maqtady.
«Ol óte tereń saıasatker. Seniń agressııańa agressııamen jaýap berý joq. Qudaı saqtasyn, kezdesken jerde jorǵalap aldyńa túsip alady, kúlimdep shyǵaryp salady. Óte tereń saıasatker adam. Bizdiń qazaqtyń arasynda sondaı adam bar ma, joq pa bilmeımin», — degen Bekbolat Tileýhan ózi patronaj jasaıtyn "Ál-Barakat" ıslamı qory arqyly, umytpasam 2007 jyly ataqty ázirbaıjandyq sáláfı ıdeology Elmır Kýlıevti Qazaqstanǵa arnaıy shaqyryp, premer-mınıstr Kárim Másimovpen tanystyrǵan-dy. Sonyń nátıjesinde N.Nazarbaevtyń tikeleı qoldaýymen ýahabı Elmır Kýlıevtiń 10 myń danadan astam sáláfılik saryndaǵy "Tafsır Saadı" kitaby QMDB meshitterine tegin taratyldy. Sol sáláfılik baǵyttaǵy Nazarbaevtyń qazaqty arabtandyrý maqsatyndaǵy syılyq Hám tegin kitabyn oqyǵan QR azamaty Abylaıhan Shalımbaev kóp jyldarǵa sottalyp ketti.
Eń paradoksti jaıt QR Din isteri jáne azamattyq qoǵam mınıstrliginiń Din isteri komıteti arnaıy dinı saraptama jasap, sáláfı Elmır Kýlıevtiń atalmysh "Tafsır Saadı"kitabyna teris qorytyndy bergen.
Atap aıtqanda normatıvtik-quqyqtyq aktilerge sáıkes, Din isteri komıteti teris qorytyndy bergen dinı ádebıetterdi QR aýmaǵynda taratýǵa tyıym salǵan.Sonymen qatar, búginde sáláfızmdi qosa alǵanda, dástúrli emes ıdeologııany nasıhattaıtyn elimizdiń óńirlerindegi barlyq dinı ónimniń jolyn kesý boıynsha is-sharalar júrgizilýde degen Din isteri komıteti sáláfızmdi ashyq nasıhattaǵan Nursultan Nazarbaev pen onyń áýletine kelgende nege tym-tyrys hám únsizdik tanytady?!
Álde budan shyǵatyn qorytyndy monarhııalyq sáláfızmdi ańsaǵan Nazarbaev pen onyń áýleti jáne sol saıası jobany júzege asyrǵysy kelgen Kárim Másimov, Qaırat Satybaldy,Bekbolat Tileýhan, Muhamedjan Tazabek sııaqtylar dinı ekstremızmge qarsy baǵyttalǵan 300 mıllıardtan astam halyqtyń aqshasyn, óz bıdaıyn ózine qýyryp, ıaǵnı ortaǵasyrlyq arabı-parsy ıdeologııany qazaqtyń sanasyna tyqpalaý men shyrmaýǵa jumsaǵan ba?! Bul degen qasqyrǵa qoı baqtyrý emes pe?!
Osy faktilerdi alǵa tarta otyryp, quzyrly organdar men memleket basshysynan qamaýdaǵy Kárim Másimovtiń úkimet pen UQK basqarǵan kezindegi ekstremızm-terrorızmge qarsy keshendi kúres baǵdarlamasyna jumsalǵan,ıaǵnı halyqtyń qyrýar aqshasynyń esebin berýin talap etemin!»—dedi ol.
