Qazaqstan Dúnıejúzilik bankten 345,7 mıllıon eýro nesıe alý týraly kelisimge qol qoıdy. Bul týraly Dúnıejúzilik banktiń baspasóz qyzmeti málimdedi, dep habarlaıdy “Adyrna” ulttyq portaly.
“24 tamyzda Dúnıejúzilik banktiń Ortalyq Azııa boıynsha aımaqtyq dırektory Tatıana Proskýrıakova men premer-mınıstrdiń orynbasary ári Qarjy mınıstri Erulan Jamaýbaev jeke sektordyń básekege qabilettiligin arttyrý jáne Qazaqstannyń COVID-19 pandemııasynan turaqty ekonomıkalyq saýyǵýyn qamtamasyz etý úshin 345,7 mıllıon eýro kólemindegi nesıelik kelisimge resmı túrde qol qoıdy”, dedi Dúnıejúzilik banktiń baspasóz qyzmeti.
Qaryz týraly kelisimdi Dúnıejúzilik banktiń dırektorlar keńesi 2021 jylǵy jeltoqsanda maquldady. Al tıisti jarlyqqa Qazaqstan prezıdenti 2 shildede qol qoıdy. Óteý merzimi – 11,5 jyl, qosymsha 2,5 jyl jeńildik kezeńi.
“Nesıeniń uzaq merzimdi sıpaty jáne paıyzdyq tólemderdiń tómendeýi jalpy syrtqy qaryzdyń ortasha óteý merzimin uzartý jáne qaryz alýdyń ortasha qunyn tómendetý arqyly eldiń jalpy qaryz profılin jaqsartady. Nesıe boıynsha beriletin qarajat úkimettiń bıýdjettik qajettilikterin qarjylandyrýdy qamtamasyz etedi”, dep habarlady Dúnıejúzilik banktiń baspasóz qyzmeti.
Qazaqstan Dúnıejúzilik bank tobyna kirgennen beri ótken 30 jylda elge kórsetilgen qoldaý kólemi 8,6 mıllıard dollardan asty.
”Adyrna” ulttyq portaly
