Búgin oblys ákimi Nurlybek Nálibaev jumys saparymen Syrdarııa jáne Jalaǵash aýdandaryna bardy. Birqatar áleýmettik, sharýashylyq nysandardyń jumysyn saralap, aýyl azamattarymen júzdesti.
Aldymen óńir basshysy Syrdarııa aýdanyndaǵy Naǵı Ilııasov aýylynda boldy. Qazaqstannyń Eńbek Eri Abzal Eralıevpen birge aýyl ishindegi jańadan salynyp jatqan “Eńbekshiler alleıasyn" kórdi.
2250 halqy bar aýylda «Nurly jol» jáne «Aýyl - El besigi» baǵdarlamalary aıasynda 126,3 mln.teńgege aýyldyq okrýginiń kireberis jolyna kúrdeli jóndeý jumystary júrgizilse, 39,7 mln.teńgege kópbalaly otbasylarǵa 3 turǵyn úı salynǵan. Sondaı-aq, 525,9 mln.teńge qarajatqa 11 kóshe qaıta jańǵyrdy.
Aýyldyń gúldenýine qomaqty úles qosqan «Abzal jáne K» TS-i jeke qarajaty esebinen aýyldy abattandyrý jáne turǵyndardy áleýmettik qamsyzdandyrý baǵyttaryna 797,2 mln.teńge qarjy bólgen. Aıtalyq, 384 mln.teńgege sport keshenin salyp, 137 mln.teńgege aýyldyq ǵımarat jańadan kóterdi. Sondaı-aq, Uly Otan soǵysynda qaza tapqandarǵa arnalǵan eskertkish qurylysy júrgizilgen.
Aımaq basshysy aýyl halqynyń turmys sapasyn kóterý basym baǵyt ekenin aıtyp, aýylda júzege asyp jatqan jobalardy ýaqytyly ári sapaly aıaqtaý qajet ekenin alǵa tartty.
- Árbir joba halyqtyń ıgiligine arnap jasalady. Onyń sharapatyn sol aýyldyń turǵyndary sezingendikten, árbir is sapaly ári ýaqytyly aıaqtalýy kerek. Týǵan jerdi, aýyldy birge kórkeıtýge tıispiz. Eń birinshi kezektegi áleýmettik máselelerdi sheshsek, aýyl halqynyń turmys sapasyn jaqsartamyz,-dedi oblys ákimi.
Oblys ákiminiń jumys sapary Jalaǵash aýdanyndaǵy «Tań» aýylynda jalǵasty. «TAŃ LTD» seriktestiginiń egis alqabyna baryp, aýylsharýashylyǵy salasyndaǵy ártaraptandyrý baǵytynda mamandarmen pikir almasty.
Aýylda memlekettik baǵdarlamalar arqyly 569,2 mln.teńgege 14 kósheniń ortasha jóndeý, 333,2 mln.teńgege mektepke kúrdeli jóńdeý jumystary júrgizilip, 140 mln.teńgege dárigerlik ambýlatorııa salynǵan.
Munan bólek, «Tań LTD» JShS-i jeke qarajaty esebinen Tań eldi mekenin abattandyrý jáne turǵyndardy áleýmettik qamsyzdandyrý baǵyttaryna 701 mln.teńge qarjy bóldi. Iaǵnı meenat azamattyń arqasynda aýylda meshit ǵımaraty jóńdelip, bóbekjaı qaıta jańǵyrtylyp, sport kesheni ǵımaratynyń qurylysy júrgen. Sonymen birge 150 mln.teńgege et óńdeý ehynyń qurylysy bastaý alǵan.
Oblys ákimi ónim óndirý máselesine toqtaldy. Syrttan keletin ónimderge degen táýeldilikti tómendetý úshin aýyldardyń aýyl sharýashylyq áleýeti joǵary bolýy kerek. Bul rette sharýalar oraq túsý maýsymyna tolyqtaı daıyn.
- Ónimniń mol bolǵany halyqtyń eńbeginiń qaıtqany. Prezıdenttiń, Úkimet basshysynyń qoldaýy negizinde bıyl sý kólemi byltyrǵy jylǵydan joǵary boldy. Birlesken kelissózderdiń arqasynda aımaqta aıtarlyqtaı qıynshylyq týyndamady. Kelesi jyly da mol ónim alý úshin jerdi aldyn ala daıyndap, egis alqaptaryna qajetti jumysty osy kezden bastap anyqtaý qajet. Astyqtyń kólemi mol bolyp, qajettilikti tolyq óteı alsaq, azyq-túlik qaýipsizdigin turaqty túrde ustap tura alamyz. Egin egýge ıkemi bar otbasylarǵa bos jerlerdi tabystap, egin egý máselesin de tapsyrdym. Baqsha daqyldaryn ózimiz óndirsek, syrt óńirdiń ónimderine degen suranysty boldyrmaımyz,-dedi N.Nálibaev.
Bıyl seriktestikte 25 myń tonna kúrish óndiriledi dep josparlanǵan. Tamyz aıynyń úshinshi onkúndiginde kúrishke oraq túspek.
Aıta keteıik, aýylda bıylǵy jyly sport keshenin ulǵaıtý maqsatynda 150 sportshyǵa arnalǵan keshenniń irgetasy qalanýda. Nysan 2023 jyly el ıgiligine berilmek.
