Oqýshylarǵa kómek kórsetýge qatysty jelidegi habarlamalarǵa oqý-aǵartý mınıstrliginiń balalardyń quqyqtaryn qorǵaý komıteti túsinikteme berdi. Vedomstvoda ata-analar jalpy bilim berý qory arqyly ár balaǵa 37 389 teńgeden kómek ala alatynyn atap ótti, dep habarlaıdy “Adyrna” ulttyq portaly.
"Jaqynda BAQ-ta Jambyl oblysyndaǵy keıbir kópbalaly ata-analardyń habarlaýy boıynsha, mektep formasy men oqýǵa qajetti qural-jabdyqtardy satyp alý úshin jergilikti atqarýshy organdar 32 500 teńgeden jáne tek bir balaǵa bóletini týraly aqparat paıda boldy. Balalardyń quqyqtaryn qorǵaý komıteti qoldanystaǵy zańnamaǵa sáıkes áleýmettik osal otbasylar úı ishindegi árbir oqýshyǵa jappaı oqytý qory arqyly kómek alýy tıis ekenin habarlaıdy. Sonymen qatar, árbir muqtaj oqýshy úshin bul soma 37 389 teńgeden kem bolmaýy tıis", – delingen habarlamada.
Komıtette ákimdikter kómek somasyn kóbeıte alatynyn, biraq azaıtýǵa quqyǵy joq ekenin atap ótti. Keıbir ákimdikter qazirdiń ózinde eń tómengi mólsherden artyq somany bólip jatyr.
Mektepterdi qarjylandyrýdy, onyń ishinde mektep oqýshylaryn qoldaýdy ákimdikter júzege asyrady. Bıyl 37 389 teńge kólemindegi kómekti kem degende 440 myńnan astam bala alady.
Buryn jappaı oqytý esebinen kómek somasy 17-den 37 myń teńgege deıin bolǵan. Sondaı-aq, mektep kerek-jaraqtaryn satyp alýmen ákimdik qyzmetkerleri aınalysty. Alaıda, oqýshylardyń ata-analary mektep formasynyń durys tańdalmaǵan mólsheri men sapasyna shaǵymdanatyn.
"Kóp balaly analardyń shaǵymdaryn eskere otyryp, áleýmettik jaǵdaıy tómen balalarǵa kómek kórsetý erejelerine ózgerister engizildi. Túzetýler ata–analardyń kartochkalyq shotqa tikeleı aqsha alýy jáne ár balaǵa mektep formasyn, aıaq kıim men oqýǵa qajetti qural-jabdyqtaryn óz betinshe tańdaı alýy úshin qabyldandy", - dep naqtylady Balalardyń quqyqtaryn qorǵaý komıteti.
Aıta keteıik, "jalpyǵa mindetti bilim berý" qorynan kelesi sanattaǵy oqýshylar kómek alý quqyǵyna ıe:
- ataýly áleýmettik kómek (AÁK)alýshylar;
- AÁK almaıtyn, biraq bir múshege tabysy eń tómengi kúnkóris deńgeıinen tómen otbasylar;
- jetim balalar jáne ata-anasynyń qamqorlyǵynsyz qalǵan balalar;
- tótenshe jaǵdaılardan zardap shekkender;
- mekteptiń alqaly organy aıqyndaıtyn oqýshylardyń ózge de sanattary.
Materıaldy kómek alý úshin ata-analar turǵylyqty jeri boıynsha bilim bólimine habarlasýy qajet.
”Adyrna” ulttyq portaly
