“Jaýap joq”: Túrkistan oblysynda sý máselesi áli de sheshilmeı tur

2743
Adyrna.kz Telegram
Foto: otyrar.kz
Foto: otyrar.kz

Túrkistan oblysy Báıdibek aýdanynyń ortalyǵy Shaıan aýylyndaǵy kópsalaly sport kesheni 2019 jyly paıdalanýǵa berilgen. Alaıda, aýdanda ortalyqtandyrylǵan káriz júıesi bolmaǵandyqtan qazir basseındegi sýdy jıi-jıi aýystyrý múmkin bolmaı tur. Bu týraly aýyl turǵyny Baqytjan Jumadildá aıtyp berdi, dep habarlaıdy “Adyrna” ulttyq portaly.

“Egerde káriz júıesine qosylǵan jaǵdaıda basseın toqtamas edi. Osy aýdan ortalyǵynan, aýyldardan talaı balalar kelip, jattyǵyp, sol basseındi paıdalanatyn edi. Osy máseleni basshylar nazarǵa alsa eken. Óıtkeni bundaı sý kesheni, tennıs korty kóp aýdandarda joq. Atalǵan sport kesheni áý basta paıdalanýǵa berilgen kezde Túrkistan oblystyq №3 olımpıada rezerviniń mamandandyrylǵan balalar men jasóspirimder sport mektebiniń ıeligine tabystalǵan. Barlyq qujattary rásimdelip, atalǵan mekteptiń menshigine ótkizilgen. Aýdandyq ákimdik qyzmetkerleriniń aıtýynsha, oblystyq Qarjy basqarmasy Ekonomıka basqarmasyna sý sport keshenine káriz júıesin salý boıynsha qarjy bólýge usynys bergen”,-deıdi ol.

Aıta keteıik, zamanaýı ǵımaratty bıznestiń áleýmettik jaýapkershiligi aıasynda aýdanda qus sharýashylyǵymen aınalysatyn Birikken Arab ámirliginiń kompanııasy salyp bergen. Joba quny 1 mlrd teńge. Munda 1 basseın men tennıs korty jáne 5 sport alańshasy bar. Sondyqtan ata-analar «basshylar osy máseleni tezirek sheship berse» deıdi.

Sonymen qatar, Baqytjan aýyldaǵy sýdyń máselesi týraly birneshe ret Túrkistan oblysy ákimdigine barǵan. Qabyldamapty.

“Báıdibek aýdany Aǵybet Aýyldyq Okrýgi Ákimdigi Aǵybet aýylynan bastaý alatyn Kishi Shaıan ózeniniń arnasy buzylyp Shaıan-Aǵybet-Shaqpaq oblystyq mańyzy bar jolǵa, 10 vt elektr baǵanalaryna qaýip tónip turǵanyn, sý deńgeıiniń tómen túsip aýyldaǵy qudyqtardyń tartylyp tuzdanǵanyn aıtý úshin 2021 jyly arnaıy Túrkistan qalasyna oblys ákiminiń orynbasary Jetpisbaı Arman Sháripbaıulyna baryp edim, qabyldamady. 2022 jyly aqpan aıynda onlaın túrde qabyldaýynda boldym. Báıdibek aýdany ákimdiginiń jazǵan suranys hatyna jaýap bar ma bilmedim, maǵan kúni búginge deıin eshqandaı jaýap kelmedi. Jeke qabyldaýda bolǵan soń jaýap berý kerek emes pe? Aǵybet aýylynan 2019 jyly paıdalanýǵa beriledi dep aldaýsyratqan dárigerlik emhananyń qujattary áli kúnge deıin daıyn emes. Dárigerlik emhana jaıy men 2022 jyly Túrkistan oblysy ákiminiń orynbasary Sábıtov Arman Sábıtulynyń qabyldaýynda onlaın túrde bolǵanmyn, Arman Sábıtulynan da jaýap hat bolmady. Sonda biz qandaı memlekette ómir súrip jatyrmyz? Jeke qabyldaýda bolamyz tııanaqty, naqty jaýap ala almaımyz? Halyqtyń muń-muqtajyn kim tyńdaıdy, A. Sháripbaıuly men A. Sábıtulynyń qabyldaýlary tek statıstıka úshin kerek bolǵany ma? Qyrkúıek aıynda aımaq basshysy Shókeev Ómirzaq Estaıuly Báıdibek aýdanyna kelse osy eki orynbasarynyń ústinen shaǵym aıtsam deımin? Úkimet basshysy Álıhan Smaıylov óńirlerdi aralar ma eken, muń-muqtajymyzdy aıtyp ishtegi kijilderdi shyǵaryp kómek surar edik. Tómendegi Túrkistan Oblysynyń Qoǵamdyq Db jiberilgen hatta maǵan jetpegen, sebebin kim túsindirer eken?”, dep kúıindi ol.

”Adyrna” ulttyq portaly

Pikirler