Jambyl oblysynyń Sarysý aýdanynda qatty jaýyn-shashyn saldarynan sý basýyna baılanysty materıaldyq shyǵyndy zerdeleý boıynsha jumystar júrgizilip jatyr. Bul týraly Jambyl oblysy ákimdiginiń baspasóz qyzmetinen málim etti, dep habarlaıdy “Adyrna” ulttyq portaly.
Aıta ketsek, 7 shilde kúni Sarysý aýdany aýmaǵynda qatty jaýyn-shashyn saldarynan kólbeý aǵyn qalyptasyp, birqatar kóshedegi 400-den astam úıdiń aýlasy, 47 úıdiń ishi men 1 mekteptiń jertólesin sý aldy.
Sarysý aýdanynda tótenshe jaǵdaı saldarynan bolǵan mán-jaılarǵa baılanysty materıaldyq shyǵyndy zerdeleý boıynsha jumysshy top quryldy.
«Qazir tótenshe jaǵdaılar departamentiniń qyzmetkerleri sý sorý jumystaryn jalǵastyrýda. Saǵat 18:30-daǵy jaǵdaı boıynsha 18 600 m3 sý soryldy. Jalpy 128 aýla men 47 úıdiń ishi sýdan tazartyldy. Jańatas qalasyndaǵy eki eldi meken (Maloetajka, Degeres) jaryqqa qosyldy. Tek D. Qonaev orta mektebinde sýdan tazartý jumystarynyń júrgizilýine baılanysty jaryq áli berilmedi. Tótenshe jaǵdaı saldarynan bolǵan materıaldyq shyǵyndy zerdeleý boıynsha jumysshy top qurylyp, jumys júrgizip jatyr», - dep habarlady oblys ákimdiginen.
Búgin, 8 shilde, tańerteń ushqyzsyz ushý apparatynyń kómegimen sý deńgeıiniń edáýir tómendegeni anyqtaldy. Adam, mal shyǵyny joq.
Zardap shekken turǵyndar úshin 105 oryndyq eki qabyldaý pýnkti daıyndyqqa keltirilip, oǵan 12 adam ornalystyryldy. Qazir olar óz erikterimen úılerine qaıtaryldy.
«Jańatas–Saýdakent» tas joly ashyq.
Tótenshe jaǵdaıdy joıýǵa azamattyq qorǵaý qyzmetterinen 282 adam, 64 tehnıka, 35 motopompa jáne 1 ushqyzsyz ushý apparaty jumyldyrylǵan.
Aıta keteıik, Jambyl oblysynyń ákimi Erbol Qarashókeev keshe túnde Sarysý aýdany Jańatas qalasyna baryp, sý alǵan aýlalardy aralap kórip, ahýalmen tanysty.
Aýdandaǵy ahýal aımaq basshysynyń baqylaýynda.
