Foto Jİ-men jasalǧan
SQO-da tabiǧi resurstar jäne tabiǧat paidalanudy retteu basqarmasynyŋ būrynǧy basşysyna qatysty sot bastaldy, dep habarlaidy “Adyrna”.
Būl turaly oblystyq sot habarlady.
Erbolat Bekşenov qyzmettık ökılettıgın paidalanyp alaiaqtyq jasady jäne para beruge arandatty dep aiyptalyp otyr.
Is boiynşa Bekşenovpen bırge alty orman şaruaşylyǧynyŋ direktory da sot aldynda jauap berude. Olardyŋ bırıne para beruge kömektestı, al qalǧandaryna para beruge oqtaldy degen aiyp taǧylǧan.
Prokuraturanyŋ mälımetınşe, oqiǧa 2025 jyly mamandandyrylǧan tabiǧat qorǧau prokuraturasy jürgızgen tekseruden keiın bastalǧan. Tekseru barysynda bes orman şaruaşylyǧynda eŋbek zaŋnamasynyŋ būzylǧany anyqtalǧan. Atap aitqanda, keibır qyzmetkerlerge jūmysqa kelmegen künderı üşın jalaqy eseptelgen. Zaŋbūzuşylyqtardy joiu turaly nūsqama berılıp, negızsız tölengen qarajat biudjetke qaitarylǧan.
Tergeu nūsqasyna säikes, osydan keiın basqarmanyŋ sol kezdegı basşysy orman şaruaşylyqtarynyŋ direktorlaryn tärtıptık keŋeste mäsele qaita qaralyp, qyzmetterınen aiyryluy mümkın ekenımen sendırgen. Mäselenı şeşuge kömektesu üşın ärqaisysynan 100 myŋ teŋgeden jinaudy ūiymdastyrǧan.
Aqşany jinau jäne jetkızu mındetı orman şaruaşylyqtarynyŋ bırınıŋ direktoryna jüktelgen. Tört basşy aqşany 1 nauryzda bergen. Taǧy bıreuı Bekşenovpen söileskennen keiın qarajat tapsyrǧan. Alaida keiın basqarma basşysynyŋ orynbasary ŪQK-nıŋ SQO boiynşa departamentıne jügınıp, jinalǧan 500 myŋ teŋgenı öz erkımen tapsyrǧan.
Sot otyrysynda Bekşenov pen bes orman şaruaşylyǧynyŋ basşysy kınälaryn moiyndaǧan. Keibır sottaluşylar prokurormen prosestık kelısım jasasuǧa niettı ekenın bıldırgen. Al taǧy bır direktor taǧylǧan aiypty joqqa şyǧaryp otyr. Onyŋ qorǧauşylary sottaluşynyŋ para beruşı emes, basşylyq tarapynan qysym körgen adam ekenın aityp, qylmystyq qudalaudy toqtatudy sūraǧan.
Aita keteiık, Erbolat Bekşenov būl basqarma basşysy qyzmetıne 2025 jyldyŋ şıldesınde taǧaiyndalǧan. Biyl säuırde Ūlttyq qauıpsızdık komitetı oǧan qatysty sotqa deiıngı tergeu bastalǧanyn rastaǧan.
