12 qaraşa, Türkıstan qalasy. Bügın Qūryltai deputaty Dihan Qamzabekūly, Qazaqstan Halyq Keŋesınıŋ müşesı Abdulla İsmatullaev, Auyl şaruaşylyǧy vise-ministrı Nazgül Hatepova jäne Su resurstary jäne irrigasiia vise-ministrı Talǧat Momyşev Türkıstan qalasynyŋ tūrǧyndarymen bırqatar kezdesu ötkızdı.
Jūmys sapary aiasynda respublikalyq top ökılderı äleumettık jäne qoǧamdyq nysandardy aralap, azamattyq jäne ǧylymi qoǧamdastyq ökılderımen, studenttermen, qala tūrǧyndarymen jäne medisina salasynyŋ qyzmetkerlerımen kezdestı. Jiynda Memleket basşysynyŋ «Jaŋa tarihi kezeŋdegı Qazaqstannyŋ özektı mındetterı» atty Qazaqstan halqyna Joldauynyŋ basym baǧyttary talqylandy.
Dostyq üiınde qala tūrǧyndarymen ötken basqosuda Joldauda belgılengen strategiialyq mındetter, qoǧamdyq kelısım men jalpyūlttyq bırlıktı nyǧaitu, jastardyŋ azamattyq belsendılıgın arttyru jäne ūlttyq qūndylyqtardy därıpteu mäselelerı qarastyryldy.
Qūryltai deputaty Dihan Qamzabekūly baǧdarlamalyq qūjattyŋ negızgı tūjyrymdaryna keŋınen toqtaldy.
– Memleket basşysynyŋ Joldauynda aiqyndalǧan ideologiialyq baǧyttardyŋ maŋyzy zor. Eldıŋ damuy tek ekonomikalyq ösımmen nemese infraqūrylymdy jaŋǧyrtumen ǧana ölşenbeidı. Eŋ aldymen, ol azamattardyŋ sanasy men qoǧamdyq qūndylyqtarǧa bailanysty. Bügınde bızge bılımdı, eŋbekqor, otanşyl ärı innovasialyq tūrǧyda oilaityn jas ūrpaq qajet. Osy tūstaadaldyq, ädıldık, zaŋǧa qūrmet jäne qoǧamdyq kelısım qaǧidattaryn nyǧaitu – strategiialyq mındetterdıŋ bırı. Äsırese jastardyŋ elge qyzmet etuge, ūlttyq qūndylyqtardy saqtauǧa jäne zamanaui tehnologiialardy meŋgeruge degen ūmtylysyn qalyptastyru airyqşa maŋyzdy, – dedı Dihan Qamzabekūly.
Deputattyŋ aituynşa, Joldauda köterılgen bastamalar ärbır qazaqstandyqtyŋ kündelıktı ömırınen körınıs tabuy tiıs. Öitkenı şynaiy otanşyldyq sözben emes, adal eŋbekpen, sapaly bılımmen, qoǧamdyq ömırge belsendı aralasumen jäne el bolaşaǧyna beijai qaramaumen ölşenedı.
Dihan Qamzabekūly jaŋa tarihi kezeŋdegı memlekettıŋ tabysty damuy, eŋ aldymen, ortaq qūndylyqtarǧa negızdelgen sanaly qoǧam men azamattyq jauapkerşılıkten bastalatynyn atap öttı.
Osydan soŋ jūmys tobynyŋ müşelerı Qoja Ahmet Iаsaui atyndaǧy Halyqaralyq qazaq-türık universitetıne baryp, ǧylymi qoǧamdastyq jäne professor-oqytuşylar qūramymen kezdestı. Bas qosuda bılım men ǧylymdy damytu, ǧylymi äleuettı arttyru, qoǧamdyq kelısımdı nyǧaitu, agrarlyq sektordy jaŋǧyrtu jäne su resurstaryn tiımdı paidalanu mäselelerı talqylandy.
Odan soŋ delegasiia müşelerı «Ūly Dala elı» ortalyǧynda Halyqaralyq turizm jäne meimandostyq universitetınıŋ studentterımen kezdestı. Aşyq dialog barysynda spikerler Memleket basşysynyŋ Joldauynda belgılengen basymdyqtardy tüsındırıp, el damuyndaǧy jastardyŋ rölıne, azamattyq jauapkerşılık pen ūlttyq bırlıktıŋ maŋyzyna, sondai-aq auyl şaruaşylyǧy men su resurstaryn tiımdı basqaru mındetterıne toqtaldy. Kezdesu soŋynda studentter özderın tolǧandyrǧan sūraqtaryn qoiyp, ūsynys-pıkırlerın bıldırdı.
