«Aýyl» partııasy Saıası keńesiniń atom elektr stanııasy qurylysy boıynsha jalpyhalyqtyq referendým ótkizýge baılanysty Qazaqstan halqyna jáne partııa múshelerine úndeý jasady, dep habarlaıdy “Adyrna” ulttyq portaly.
Partııa óz múshelerine álemdik ekonomıkanyń qazirgi jaǵdaıy, halyqaralyq naryqtardaǵy qatań básekelestiktiń artýy, geosaıası teketirestiń kúsheıýi árbir memleketke energetıkalyq qaýipsizdik máselelerine basa kóńil bólýdi talap etetinin habarlap, úndeý jasady.
“Básekege qabiletti, ári sapaly ónerkásip pen aýyl sharýashylyǵy ónimderin óndirý otandyq energetıkany qarqyndy damytý qajettiligin týyndatyp otyr.
Elimizde dástúrli jáne dástúrli emes kózderden energııa óndirýdiń ózindik problemalary bar ekeni belgili. Mysaly, sońǵy kezderi sý tapshylyǵynyń artýy bizdi sý elektr energııasyn óndirýdiń bolashaǵyna kúmánmen qaraýǵa májbúrleıdi. Munaı men gaz qorlary da sheksiz emes. Sondyqtan munaı, gaz qorlaryna negizdelgen uzaq merzimdi paıdalanylatyn energetıkalyq jobalardy josparlaý múmkin emes.
Kómir otynyn paıdalaný qazirdiń ózinde kúrdeli ekologııalyq máselelerdi týyndatýda. Atalmysh ekologııalyq máselelerdiń eń bastysy – qurǵaqshylyqqa, shóleıttenýge jáne aýyl sharýashylyǵy ónimderiniń úlesin aıtarlyqtaı joǵaltýǵa alyp keletin jahandyq klımattyń ózgerýi.
Qazaqstanda kún jáne jel energııasy sekildi dástúrli emes qýat kózderiniń aıtarlyqtaı áleýeti bar. Alaıda munyń da energııa qorlaryn jınaqtaý jáne turaqtandyrý sııaqty tehnologııalyq máselelerdiń sheshilmeýi saldarynan kómir men kómirsýtekterdi tolyqtaı almastyra almaıtyny belgili bolyp otyr. Elimiz qazirdiń ózinde elektr qýatynyń tapshylyǵyn sezinýde jáne ony aıtarlyqtaı kólemde ımporttaýǵa májbúr. Elektr qýatynyń tapshylyǵy oryn alǵanda ony eń aldymen aýyldar men aýyl sharýashylyǵy salasy ótkir sezinetinin kezinde jaryqsyz qalǵan aýyldardyń mysalynan jaqsy bilemiz. Qazirgi tańda atom elektrostanııalary álemdegi kóptegen elder úshin eń turaqty energııa kózderiniń bir bolyp otyr.
Memleket basshysy Q.K.Toqaev 2023 jylǵy 1 qyrkúıektegi Qazaqstan halqyna Joldaýynda atom elektr stanııasyn salý nemese salýdan bas tartý elimizdiń bolashaǵyna qatysty asa mańyzdy másele ekenin atap ótip, ony jalpyulttyq referendýmda sheshýdi usyndy. Óz kezeginde «Aýyl» Partııasy Qazaqstannyń ekologııalyq jáne energetıkalyq qaýipsizdigi, sondaı-aq keler urpaqtyń bolashaǵy úshin qabyldanatyn sheshimniń mańyzdylyǵyn eskere otyryp, árbir qazaqstandyqty referendýmda óz kózqarasyn bildirip, atom elektr stanııasyn salýdy qoldaýǵa shaqyrady”, - delingen búgingi joldanǵan úndeýde.
