Prezident Qasym-Jomart Toqaev Aziia oiyndary men Aziia paraoiyndarynyŋ jeŋımpazdary jäne jüldegerlerın marapattau räsımıne qatysty.
Memleket basşysy Japoniiada ötken HH Jazǧy Aziia oiyndary men V Aziia paraoiyndarynda joǧary nätije körsetken sportşylardy qūttyqtap, olardyŋ jetıstıkterı el maqtanyşy ekenın atap öttı. Sondai-aq sporttaǧy ärbır jeŋıs jas ūrpaqqa şabyt berıp, otansüigıştık ruhty nyǧaitatynyn jetkızdı.
Osy oraida qazaqstandyq boksşy, «Sportşylar keŋesınıŋ» sport direktory Qamşybek Qoŋqabaev otandyq boks mektebınıŋ jetıstıkterı, halyqaralyq arenadaǧy bäsekege qabılettılıgı jäne sportşylardy daiarlau jüiesındegı özgerıster turaly pıkır bıldırdı. Ol Törehan Sabyrhan men Aibek Oralbaidyŋ jeŋısterıne toqtalyp, ūrpaqtar sabaqtastyǧy men bapkerler eŋbegınıŋ maŋyzyn atap öttı.
Sūhbat barysynda 2027 jyly Qazaqstanda ötetın bokstan älem chempionatynyŋ maŋyzy, öŋırlerdegı sport infraqūrylymyn damytu jäne balalar sportyn qoldau mäselelerı de qozǧaldy. Qamşybek Qoŋqabaevtyŋ aituynşa, qoljetımdı sport seksiialary, bılıktı jattyqtyruşylar men jüielı memlekettık qoldau auyl-aimaqtardan jaŋa chempiondardyŋ şyǧuyna mümkındık beredı.
— Prezident Qasym-Jomart Toqaev Aziia oiyndarynyŋ jeŋımpazdaryn marapattau räsımınde qazaqstandyq boksşylar Törehan Sabyrhan men Aibek Oralbaidyŋ jetıstıkterın erekşe atap öttı. Otandastarymyzdyŋ nätijelerın qalai baǧalaisyz? Būl jeŋıster qazaqstandyq boks mektebınıŋ bügıngı äleuetı men deŋgeiı turaly nenı aŋǧartady?
— Būl jeŋısterge şyn jürekten quanamyn. Törehan Sabyrhan 70 kelıge deiıngı salmaqta, al ūlttyq qūramanyŋ kapitany Aibek Oralbai 90 kelıden joǧary salmaqta Aziia oiyndarynyŋ chempiony atandy. Ekı sportşymyz da joǧary şeberlık, myqty mınez jäne jeŋıske degen jıger tanytyp, elımızdıŋ mereiın üstem ettı. Aziia qūrlyǧyndaǧy boks bäsekesı öte joǧary ekenın eskersek, būl altyn medaldardyŋ maŋyzy erekşe.
Äsırese, Törehannyŋ jastyǧyna qaramastan osyndai ırı dodada top jaruy onyŋ ülken äleuetın körsetedı. Al Aibektıŋ qūramanyŋ kapitany retınde chempion atanuy komandanyŋ köşbasşylyq dästürın jalǧastyryp otyrǧanyn aŋǧartady. Mūndai jeŋıster sportşynyŋ jeke daiyndyǧynyŋ nätijesı ǧana emes, bapkerler qūramynyŋ jüielı eŋbegı men otandyq boks mektebınıŋ qalyptasqan täjıribesınıŋ jemısı dep bılemın.
Memleket basşysy Qasym-Jomart Toqaevtyŋ jıgıtterdıŋ jetıstıgın marapattau räsımınde jeke atap ötuı bükıl boks qauymdastyǧy üşın ülken märtebe ärı zor qoldau. Būl – sportşylardyŋ eŋbegıne berılgen joǧary baǧa. Osyndai qūrmet jas boksşylarǧa da erekşe serpın berıp, ülken maqsattarǧa ūmtyluǧa jıgerlendıredı.
Jalpy, būl nätijeler qazaq boks mektebınıŋ äleuetı joǧary ekenın jäne jaŋa buynnyŋ qalyptasqan dästürdı laiyqty jalǧastyryp kele jatqanyn körsetedı. Bügınde elımızde halyqaralyq deŋgeide bäsekege qabılettı, tehnikalyq daiyndyǧy joǧary, jeŋıske degen ruhy myqty sportşylar ösıp keledı. Sondyqtan aldaǧy uaqytta da boksşylarymyzdan jarqyn jeŋıster kütemın. Eŋ bastysy, osyndai jetıstıkter keiıngı jas buynǧa ülgı bolyp, elımızde boks sportynyŋ odan ärı damuyna yqpal etedı.
— Qazaqstan boksy halyqaralyq arenada dästürlı türde joǧary nätijeler körsetıp keledı. Sızdıŋ oiyŋyzşa, onyŋ älemdık bäsekege qabılettılıgın saqtauǧa qandai artyqşylyqtar yqpal etıp otyr? Soŋǧy jyldary sportşylardy daiarlau jüiesınde qandai maŋyzdy özgerıster boldy?
— Bızdıŋ basty artyqşylyǧymyz – qalyptasqan myqty boks mektebı men ūrpaqtar sabaqtastyǧy. Qazaqstandyq bokstyŋ özındık dästürı bar. Täjıribelı chempiondar men bılıktı jattyqtyruşylar özderınıŋ mol täjıribesı men bılımın jas sportşylarǧa üiretıp, olardyŋ käsıbi tūrǧyda qalyptasuyna üles qosyp keledı. Osyndai sabaqtastyqtyŋ arqasynda boks mektebımızdıŋ deŋgeiı jyldan-jylǧa nyǧaiyp keledı.
Soŋǧy jyldary sportşylardy daiarlau jüiesınde de maŋyzdy özgerıster jüzege asyryldy. Atap aitqanda, jattyqtyruşylardyŋ jalaqysy östı, jattyqtyruşylyq qyzmet, oqytu ädıstemesı jäne sportşylardy oŋaltu baǧyttary boiynşa jaŋa bılım beru baǧdarlamalary aşyldy. Būl mamandardyŋ käsıbi bılıktılıgın arttyryp, zamanaui daiyndyq täsılderın täjıribege engızuge mümkındık berıp otyr.
Sonymen qatar ūlttyq qūramalardyŋ halyqaralyq jarystarǧa daiyndyǧyna tūraqty qoldau körsetıledı. Oqu-jattyǧu jiyndaryn ūiymdastyru, sportşylardyŋ fizikalyq jäne taktikalyq daiyndyǧyn jetıldıru jūmystary jüielı türde jürgızılıp keledı. Mūnyŋ barlyǧy boksşylardyŋ şeberlıgın şyŋdap, halyqaralyq arenada joǧary nätije körsetuıne tıkelei yqpal etedı.
— Memleket basşysy sporttyŋ Qazaqstannyŋ halyqaralyq bedelın nyǧaitudaǧy maŋyzyn atap öttı. 2027 jyly elımızde bokstan älem chempionaty ötedı. Osyndai auqymdy jarysty qabyldaudyŋ otandyq boks mektebı men elımızdıŋ sporttyq äleuetın odan ärı damytu üşın maŋyzy qandai?
— Älem chempionatyn öz elımızde ötkızu – bız üşın ülken mümkındık ärı zor jauapkerşılık. Mūndai auqymdy jarystyŋ Qazaqstanda ūiymdastyryluy otandyq boks mektebınıŋ damuyna tyŋ serpın beredı. Äsırese, öz janküierlerınıŋ aldynda öner körsetu sportşylarǧa erekşe jıger berıp, jeŋıske degen ūmtylysyn arttyrady. Tuǧan eldıŋ qoldauyn sezınu är boksşy üşın maŋyzdy motivasiia dep oilaimyn.
Sonymen qatar būl chempionat jas boksşylar üşın ülken täjıribe ärı şabyt közı bolmaq. Olar älemnıŋ üzdık boksşylaryn öz közımen körıp, olardyŋ şeberlıgı men daiyndyq deŋgeiın baǧalap, bolaşaqta solardai biık belesterdı baǧyndyruǧa ūmtylady. Mūndai halyqaralyq jarystar jastardyŋ sportqa degen qyzyǧuşylyǧyn arttyryp, jaŋa chempiondardyŋ qalyptasuyna jol aşady.
Būdan bölek, älem chempionatyn ötkızu Qazaqstannyŋ halyqaralyq sport arenasyndaǧy bedelın arttyryp, elımızdıŋ ırı sporttyq ıs-şaralardy ūiymdastyru täjıribesın nyǧaitady. Būl otandyq boks üşın de, jalpy elımızdıŋ sport salasy üşın de maŋyzdy oqiǧa bolmaq. Sondyqtan aldaǧy chempionattan ülken ümıt kütemız.
— Prezident jariialaǧan «Halyqtyq qūrylys» baǧdarlamasy aiasynda barlyq öŋırde sport nysandaryn salu közdelgen. Zamanaui sport infraqūrylymyn keŋeitu, äsırese şaǧyn qalalar men auyldyq jerlerde bokstyŋ damuyna qanşalyqty yqpal ete alady?
— İnfraqūrylym – sportty damytudyŋ negızgı tırekterınıŋ bırı. Elımızde sportqa qyzyǧatyn, boiynda qabıletı bar talantty balalar köp. Eŋ maŋyzdysy – olardyŋ öz äleuetın aşuyna qajettı jaǧdai jasau. Sonyŋ ışınde sapaly jattyǧu zaldary men zamanaui sport nysandarynyŋ qoljetımdı boluy erekşe röl atqarady.
Soŋǧy jetı jylda elımızde 536 jaŋa sport nysany salyndy. Al Memleket basşysy jariialaǧan baǧdarlama aiasynda aldaǧy uaqytta barlyq öŋırde jaŋa sport nysandary boi köteredı. Būl bastamalar äsırese şaǧyn qalalar men auyldyq jerlerdegı balalar üşın ülken mümkındık dep sanaimyn. Öitkenı zamanaui sport zaldary aşylsa, auyl jastary da käsıbi jattyǧuǧa qatysyp, öz şeberlıgın şyŋdap, ülken sportqa qadam basa alady.
Boks tarihyna köz jügırtsek, talai tanymal chempion qarapaiym auyldar men şaǧyn qalalardan şyqqan. Sondyqtan ärbır eldı mekendegı jas talanttyŋ jolyn aşu maŋyzdy. Bügıngı taŋda jasalǧan jaǧdai erteŋ halyqaralyq arenada Qazaqstannyŋ namysyn qorǧaityn jaŋa chempiondardyŋ qalyptasuyna negız bolady.
— Qasym-Jomart Toqaev balalar sportyn damytudy memlekettıŋ strategiialyq mındetterınıŋ bırı retınde atady. Öz täjıribeŋızge süiene otyryp aitsaŋyz, öŋırlerdegı daryndy balalardyŋ alǧaşqy jattyǧularynan bastap halyqaralyq jeŋısterge deiıngı joldan ötuı üşın qandai jaǧdailar qajet? Būl rette memlekettık qoldau men jas sportşylarmen jüielı jūmystyŋ rölı qandai?
— Talantty sportşynyŋ ülken joly eŋ aldymen alǧaşqy jattyǧudan bastalady. Sondyqtan būl baǧyttaǧy basty şart – bılıktı jattyqtyruşy men balalarǧa qoljetımdı sport seksiialarynyŋ boluy. Balanyŋ boiyndaǧy qabılettı der kezınde baiqap, ony dūrys baǧyttap, sportqa degen qyzyǧuşylyǧyn arttyru maŋyzdy. Osy rette jattyqtyruşynyŋ käsıbi şeberlıgı men tärbielık eŋbegınıŋ orny erekşe.
Qazırgı taŋda memleket balalarǧa arnalǧan tegın sport seksiialary men üiırmelerdı qarjylandyryp otyr. Būl, äsırese, öŋırler men auyldyq jerlerde tūratyn balalar üşın ülken mümkındık. Ärbır balanyŋ otbasylyq jaǧdaiyna qaramastan sportpen ainalysyp, öz qabıletın damytuǧa jol aşylady. Mūndai qoldau jas sportşylardyŋ qatarynyŋ köbeiuıne jäne jaŋa talanttardyŋ anyqtaluyna yqpal etedı.
Odan keiın är sportşynyŋ daiyndyǧyn jüielı türde baqylap, qabıletıne qarai jarystarǧa qatystyryp, käsıbi ösuıne qajettı qoldau körsetu qajet. Sportşynyŋ jetıstıgı – ūzaq uaqytqa sozylatyn eŋbektıŋ nätijesı. Eger memlekettık qoldau, jattyqtyruşynyŋ bılımı men täjıribesı jäne balanyŋ öz talpynysy bır arnada toǧyssa, auyldan şyqqan jas sportşynyŋ da älem chempiony atanuǧa tolyq mümkındıgı bar. Bızdıŋ maqsatymyz – osyndai talanttardyŋ jolyn aşyp, olardyŋ ülken sportta öz ornyn tabuyna jaǧdai jasau.
