Qazaqstanda äleumettık, kölık jäne injenerlık infraqūrylymdy jaŋǧyrtu üşın 2029 jyldyŋ soŋyna deiın Ūlttyq qordan şamamen 6,5 trillion teŋge bölınedı. Būl turaly memleket basşysy Qasym-Jomart Toqaev öz joldauynda aitty, dep habarlaidy «Adyrna» tılşısı.
Prezidenttıŋ sözınşe, el boiynşa asa qajettı infraqūrylym nysandaryn salu jäne jaŋǧyrtu jūmystary qolǧa alynady. Osy maqsatta Ükımet būryn-soŋdy bolmaǧan İnfraqūrylymdyq jaŋǧyru josparyn äzırleidı.
«Būl auqymdy jūmysty ıske asyru üşın 2029 jyldyŋ soŋyna deiın Ūlttyq qordan şamamen 6,5 trillion teŋge bölınedı. Biyl jäne 2027 jyldyŋ alǧaşqy ekı aiy ışınde äleumettık jobalardy ıske qosu üşın 1,5 trillion teŋge kölemınde qarajat qarastyru qajet», – dedı Qasym-Jomart Toqaev.
Prezident el ekonomikasynyŋ äleuetıne de toqtaldy. Onyŋ sözınşe, Halyqaralyq valiuta qorynyŋ boljamyna säikes, biyl Qazaqstannyŋ jalpy ışkı önımı 400 milliard dollarǧa juyqtaidy. Jan basyna şaqqandaǧy körsetkış 19 myŋ dollardan asady dep kütılude.
Sonymen qatar memleket basşysy öŋdeu önerkäsıbınıŋ jalpy ışkı önımdegı ülesı 14 paiyzdan asqanyn, al altyn-valiuta rezervı men Ūlttyq qor aktivterınıŋ jalpy kölemı 130 milliard dollardan joǧary ekenın atap öttı.
Toqaev būl äleuettı infraqūrylymdy jaŋǧyrtuǧa jäne öŋırlerdı damytuǧa baǧyttau qajettıgın aitty.
Būdan bölek, prezident qalalardy damytu mäselesıne de nazar audardy. Onyŋ pıkırınşe, ärbır ırı qalanyŋ Ükımet bekıtken orta jäne ūzaq merzımdı damu jospary boluy kerek. Sondai-aq qala infraqūrylymyn tiımdı basqaru üşın onyŋ sifrlyq syŋaryn äzırleu tapsyryldy.
Memleket basşysy qalalardyŋ qauıpsız, jaily ärı körıktı boluyn maŋyzdy memlekettık mındet retınde qarastyru qajettıgın jetkızdı. Onyŋ aituynşa, qalalardyŋ qarqyndy damuy öŋır ekonomikasynyŋ örkendeuıne jäne adami äleuettıŋ artuyna yqpal etedı.
