Foto: Aqorda
Qazaqstan Prezidentı Qasym-Jomart Toqaev qazaqstandyqtardy ūlttyq mereke – Respublika künımen qūttyqtady, dep habarlaidy "Adyrna".
Memleket basşysynyŋ qūttyqtauynda eldıŋ täuelsızdık jyldaryndaǧy jetıstıkterı, konstitusiialyq reformalardyŋ maŋyzy jäne Qazaqstannyŋ aldaǧy damu baǧyttary atap ötıldı.
«Barşaŋyzdy ūlttyq merekemız – Respublika künımen qūttyqtaimyn!» – dedı Prezident.
Memleket basşysy Respublika künı qazaq memlekettılıgınıŋ qaita jaŋǧyruyn aişyqtaityn qasterlı mereke ekenın atap öttı.
«Būl – myŋjyldyqtardan tamyr tartatyn qazaq memlekettılıgınıŋ qaita jaŋǧyruyn aişyqtaityn qasterlı mereke», – delıngen qūttyqtauda.
Qasym-Jomart Toqaevtyŋ aituynşa, Qazaqstan egemendık jyldarynda köptegen syn-qaterdı eŋserıp, maŋyzdy belesterdı baǧyndyrdy. Bügınde el ekonomikasy quatty, qoǧamy jasampaz, halyqaralyq arenadaǧy bedelı joǧary memleket retınde damyp keledı.
«Qazaqstan Täuelsızdıktıŋ 35 jyldyq mejesıne ekonomikasy quatty, qoǧamy jasampaz, küllı älem qauymdastyǧy qūrmetpen qaraityn, bedelı zor ärı yqpaldy orta derjava, örkeniettı memleket retınde jetıp otyr», – dep atap öttı Prezident.
Memleket basşysy el damuynyŋ jaŋa kezeŋınde myqty memlekettık instituttardy qalyptastyru, adam kapitalyn damytu jäne jahandyq bäsekege qabılettılıktı arttyru maŋyzdy mındet ekenın aitty.
«Aldymyzda tūrǧan maqsat – barşaǧa aiqyn. Bız myqty memlekettık instituttary men sapaly adam kapitaly bar, jahandyq bäsekege qabılettı, ozyq, damyǧan, jasampaz, zaiyrly el boluymyz kerek», – dedı ol.
Prezident Konstitusiianyŋ zaŋdy küşıne enuın el tarihyndaǧy erekşe oqiǧa retınde baǧalady. Onyŋ sözınşe, Ata zaŋ memlekettık basqaru jüiesın jaŋartuǧa, sondai-aq saiasi, ekonomikalyq, mädeni jäne äleumettık salalarda tübegeilı özgerıster jasauǧa serpın berdı.
Sonymen qatar Qasym-Jomart Toqaev Qazaqstanda ozyq tehnologiialar men innovasiialardy damytu, jasandy intellekt mümkındıkterın el igılıgıne paidalanu, zamanaui öndırıs oryndaryn aşu jäne infraqūrylymdy jaŋǧyrtu jūmystary jalǧasyp jatqanyn jetkızdı. Mektepter, auruhanalar jäne basqa da äleumettık nysandar salu da basym baǧyttardyŋ qatarynda.
Memleket basşysy qoǧamda bılımge ūmtylu, adal eŋbek, jauapkerşılık pen otanşyldyq qūndylyqtaryn nyǧaitudyŋ maŋyzyn atap öttı. Sondai-aq Zaŋ men Tärtıp, Tazalyq pen qorşaǧan ortaǧa qamqorlyq, Bırlık pen Kelısım qaǧidattaryn därıpteu arqyly jaŋa qoǧamdyq etika qalyptastyru jūmystary jürgızılıp jatqanyn aitty.
«Osylaişa, egemendıgımızdıŋ tūǧyryn küşeitıp, Ädılettı, Qauıpsız, Ozyq ärı Taza Qazaqstandy qūryp jatyrmyz», – dedı Prezident.
Qūttyqtau soŋynda Qasym-Jomart Toqaev eldıŋ bırlıgı men ruhynyŋ biık boluyna tılektestık bıldırdı.
«Elımızdıŋ şaŋyraǧy biık, ūltymyzdyŋ ruhy asqaq bolsyn! Kök bairaǧymyz ärdaiym biıkte jelbıresın! Respublika künı qūtty bolsyn!» – dep tüiındedı Memleket basşysy.
