(foto:twitter.com/Rogozin)
Baıqońyrdaǵy Pýtındi qoldaý mıtıngine qatysty senat depýtattary pikir bildirdi. Olar bul derek anyqtalsa, uıymdastyrǵandar jazalanýy kerektigin aıtty, dep habarlaıdy “Adyrna” ulttyq portalyEkspress K saıtyna silteme jasap.
Senator Murat Baqtııarulynyń aıtýynsha, aldymen bul oqıúany Facebook jelisinen kórip, keıin Baıqońyr qalalyq bilim basqarmasyna hat jazǵan. Jaýap kútip otyr.
“Baıqońyrda Qazaqstannyń jáne Reseıdiń quziretin jatatyn mektepter bar. Shyn máninde 10-11 synyp oqýshylary mıtıng shyǵyp jatsa bul durys emes. Muny uıymdastyrǵan adamdar jazasyn alýy tıis. Balalardy saıasatqa aralastyrmaý kerek", — deıdi Murat Baqtııaruly.
Ol osy rette buıryq bergen mektep dırektorlarynyń attary atalyp, qyzmetinen ketý kerek dep sanaıdy.
“Ózim Qyzylorda oblysynyń týmasymyn. Depýtat retinde Parlamentte Baıqońyrǵa qatysty birneshe saýal da joldadym. Ol jerde tek Reseıdiń zańdary ǵana júredi. Jalǵa alyp otyrǵan soń, kelisi-mshart solaı bolyp ketken,— deıdi depýtat.
Al Senattyń halyqaralyq qatynastar, qorǵanys jáne qaýipsizdik jónindegi komıtetiniń tóraǵasy Muhtar Qul-Muhammed Balalar quqyǵy jónindegi ýákil osymen aınalysýy tıis dep sanaıdy.
"Baıqońyrda osyndaı derek bolsa, bul adamnyń quqyǵyn buzý, májbúrleý bolyp sanalady. Jalǵyz eresek adamdardyń ǵana emes, balalardyń da quqyǵy bolady. Balalar quqyǵy jóninde bizde ýákil bar. Soǵan osy derekti usyný kerek. Eshkimniń balalardy mıtıngke májbúrleýge qaqysy joq",- deıdi Muhtar Qul-Muhammed.
Aıta keteıik, buǵan deıin Baıqońyrda oqýshylardy Pýtındi qoldaý úshin mıtıngke shyǵarǵan.
“Adyrna” ulttyq portaly
