Reseı prezıdenti Vladımır Pýtın «Vagner» jekemenshik áskerı kompanııasynyń kóterilisi kezinde áskerı ushqyshtardyń qaza tapqanyn moıyndady, dep habarlaıdy «Adyrna» tilshisi.
«Qaza tapqan ushqyshtardyń batyldyǵy elimizdi qutqaryp qaldy», - dedi basshy «Birinshi arnanyń» efırinde sóılegen sózinde.
Memleket basshysy durys sheshim qabyldap, keri shegingen jaldamalylarǵa alǵysyn bildirdi.
«Sizderge alǵys aıtamyz. Reseı Qorǵanys mınıstrligimen kelisimshart jasasyp, týǵan-týystaryńyzǵa nemese Belarýske barýdy usynamyz. Men bergen ýáde oryndalady.Tańdaý óz erikterińizde. Biraq bul óziniń qaıǵyly qateligin túsingen reseılik sarbazdardyń tańdaýy bolatynyna senimdimin»,—dedi Pýtın.
Sondaı-aq prezıdent qantógisti boldyrmaýǵa baǵyttalǵan qadamdar onyń tikeleı nusqaýy boıynsha jasalǵanyn atap ótti.
Eske salaıyq, 24 maýsymǵa qaraǵan túni Prıgojın Reseıdiń resmı áskerı basshylyǵyn soqqy berdi dep aıyptap, ózi "ádilet marshy" dep ataǵan áskerı narazylyq sharasyn ótkizgen. Olar Dondaǵy Rostov qalasynan Máskeýge 200 shaqyrym qalǵansha júrip barǵan. Búlik faktisi boıynsha qylmystyq is qozǵaldy. Sol kezde jasaǵan málimdemesinde Pýtın Prıgojındi "satqyn" dep aıyptaǵan bolatyn. "Bul – satqyndyq. Shamadan tys ambıııalar satqyndyqqa ákeldi," - degen bolatyn Reseı basshysy. Alaıda sońǵy sátte, resmı nusqa boıynsha, Belarýs prezıdenti Aleksandr Lýkashenkonyń arashalaýymen Prıgojın mámilege kelip, áskerin Máskeýden keri qaıtardy. Sondaı-aq Reseı prezıdentiniń baspasóz hatshysy qylmystyq isti toqtatý týraly sheshim qabyldanǵanyn habarlaǵan.
