Şymkent qalasynda merzımdı äskeri qyzmetke şaqyrylǧan azamattardy saltanatty türde şyǧaryp salu räsımı öttı.
Qalanyŋ 27 azamaty Qazaqstan Respublikasy Memlekettık küzet qyzmetınıŋ qataryna attandy.
Saltanatty ıs-şara «Abai» saiabaǧyndaǧy Ūly Otan soǧysy ardagerlerıne arnalǧan eskertkış janynda ūiymdastyryldy. Räsımge Şymkent qalasy äkımınıŋ bırınşı orynbasary Aidyn Kärımov, Qaruly Küşterdıŋ ardagerlerı, audan äkımdıkterınıŋ ökılderı, sondai-aq äskerge attanuşylardyŋ ata-analary men jaqyndary qatysty.
Jiynda Memlekettık küzet qyzmetınıŋ strategiialyq nysandar men memleket basşylyǧynyŋ qauıpsızdıgın qamtamasyz etudegı maŋyzdy rölı atap ötıldı. Osyǧan bailanysty qyzmetke ümıtkerlerdı ırıkteu kezınde olardyŋ dene daiyndyǧyna, tärtıbıne, psihologiialyq tūraqtylyǧyna jäne jeke qasietterıne joǧary talaptar qoiylady.
Şymkent qalasy äkımınıŋ bırınşı orynbasary Aidyn Kärımov Otan aldyndaǧy azamattyq boryşty öteudıŋ maŋyzdylyǧyna toqtalyp, äskerge attanuşylarǧa aqjoltai tılegın jetkızdı.
– Otanǧa qyzmet etu – qasiettı boryş. Bügın sızder osy boryşty öteuge qadam basqaly tūrsyzdar. Memlekettık küzet qyzmetınde äskeri qyzmet atqaru – zor märtebe ärı ülken jauapkerşılık. Sızder äkelerıŋız ben atalaryŋyzdyŋ daŋqty dästürın abyroimen jalǧastyryp, memleketımızge senımdı tırek, öskeleŋ ūrpaqqa ülgı bolasyzdar dep senemız. Azamattyq boryştaryŋyzdy abyroimen ötep, aman-esen elge oralyŋyzdar, – dedı qala äkımınıŋ bırınşı orynbasary.
Öz kezegınde Şymkent qalasynyŋ qorǧanys ısterı jönındegı departamentınıŋ bastyǧy polkovnik Äbdıǧabit Şegebaevtyŋ aituynşa, Memlekettık küzet qyzmetıne ırıktelu – jastardyŋ joǧary daiyndyq deŋgeiı men olarǧa körsetılgen memlekettık senımnıŋ belgısı.
– Memlekettık küzet qyzmetındegı äskeri qyzmet joǧary tärtıptı, tözımdılıktı jäne jauapkerşılıktı talap etedı. Şymkenttık äskerge şaqyryluşylar öŋır namysyn abyroimen qorǧap, äskeri boryştaryn adal atqarady dep senemın, – dedı polkovnik Äbdıǧabit Şegebaev.
Saltanatty räsım barysynda jas sarbazdarǧa aq jol tılenıp, ata-analary men jaqyndary sättı qyzmet tılep, qoldau bıldırdı.
Äskerge şaqyryluşylardy jöneltu küzgı äskerge şaqyru nauqany aiasynda jüzege asyryluda. Būl jūmys Qazaqstan Respublikasynyŋ Qaruly Küşterı men basqa da äskerlerın josparly türde jasaqtauǧa baǧyttalǧan.
Aita keteiık, küzgı äskerge şaqyru nauqany aiasynda Şymkent qalasynan 1300-den astam azamatty merzımdı äskeri qyzmetke jıberu josparlanǧan. Bügıngı taŋda öŋırden Ūlttyq qauıpsızdık komitetınıŋ Şekara qyzmetıne 200-den astam, al Qazaqstan Respublikasy Işkı ıster ministrlıgınıŋ Ūlttyq ūlanyna 250-ge juyq azamat attandy.
