شىمكەنت قالاسىندا مەرزىمدى اسكەري قىزمەتكە شاقىرىلعان ازاماتتاردى سالتاناتتى تۇردە شىعارىپ سالۋ ءراسىمى ءوتتى.
قالانىڭ 27 ازاماتى قازاقستان رەسپۋبليكاسى مەملەكەتتىك كۇزەت قىزمەتىنىڭ قاتارىنا اتتاندى.
سالتاناتتى ءىس-شارا «اباي» ساياباعىنداعى ۇلى وتان سوعىسى ارداگەرلەرىنە ارنالعان ەسكەرتكىش جانىندا ۇيىمداستىرىلدى. راسىمگە شىمكەنت قالاسى اكىمىنىڭ ءبىرىنشى ورىنباسارى ايدىن كارىموۆ، قارۋلى كۇشتەردىڭ ارداگەرلەرى، اۋدان اكىمدىكتەرىنىڭ وكىلدەرى، سونداي-اق اسكەرگە اتتانۋشىلاردىڭ اتا-انالارى مەن جاقىندارى قاتىستى.
جيىندا مەملەكەتتىك كۇزەت قىزمەتىنىڭ ستراتەگيالىق نىساندار مەن مەملەكەت باسشىلىعىنىڭ قاۋىپسىزدىگىن قامتاماسىز ەتۋدەگى ماڭىزدى ءرولى اتاپ ءوتىلدى. وسىعان بايلانىستى قىزمەتكە ۇمىتكەرلەردى ىرىكتەۋ كەزىندە ولاردىڭ دەنە دايىندىعىنا، تارتىبىنە، پسيحولوگيالىق تۇراقتىلىعىنا جانە جەكە قاسيەتتەرىنە جوعارى تالاپتار قويىلادى.
شىمكەنت قالاسى اكىمىنىڭ ءبىرىنشى ورىنباسارى ايدىن كارىموۆ وتان الدىنداعى ازاماتتىق بورىشتى وتەۋدىڭ ماڭىزدىلىعىنا توقتالىپ، اسكەرگە اتتانۋشىلارعا اقجولتاي تىلەگىن جەتكىزدى.
– وتانعا قىزمەت ەتۋ – قاسيەتتى بورىش. بۇگىن سىزدەر وسى بورىشتى وتەۋگە قادام باسقالى تۇرسىزدار. مەملەكەتتىك كۇزەت قىزمەتىندە اسكەري قىزمەت اتقارۋ – زور مارتەبە ءارى ۇلكەن جاۋاپكەرشىلىك. سىزدەر اكەلەرىڭىز بەن اتالارىڭىزدىڭ داڭقتى ءداستۇرىن ابىرويمەن جالعاستىرىپ، مەملەكەتىمىزگە سەنىمدى تىرەك، وسكەلەڭ ۇرپاققا ۇلگى بولاسىزدار دەپ سەنەمىز. ازاماتتىق بورىشتارىڭىزدى ابىرويمەن وتەپ، امان-ەسەن ەلگە ورالىڭىزدار، – دەدى قالا اكىمىنىڭ ءبىرىنشى ورىنباسارى.
ءوز كەزەگىندە شىمكەنت قالاسىنىڭ قورعانىس ىستەرى جونىندەگى دەپارتامەنتىنىڭ باستىعى پولكوۆنيك ابدىعابيت شەگەباەۆتىڭ ايتۋىنشا، مەملەكەتتىك كۇزەت قىزمەتىنە ىرىكتەلۋ – جاستاردىڭ جوعارى دايىندىق دەڭگەيى مەن ولارعا كورسەتىلگەن مەملەكەتتىك سەنىمنىڭ بەلگىسى.
– مەملەكەتتىك كۇزەت قىزمەتىندەگى اسكەري قىزمەت جوعارى ءتارتىپتى، توزىمدىلىكتى جانە جاۋاپكەرشىلىكتى تالاپ ەتەدى. شىمكەنتتىك اسكەرگە شاقىرىلۋشىلار ءوڭىر نامىسىن ابىرويمەن قورعاپ، اسكەري بورىشتارىن ادال اتقارادى دەپ سەنەمىن، – دەدى پولكوۆنيك ابدىعابيت شەگەباەۆ.
سالتاناتتى ءراسىم بارىسىندا جاس ساربازدارعا اق جول تىلەنىپ، اتا-انالارى مەن جاقىندارى ءساتتى قىزمەت تىلەپ، قولداۋ ءبىلدىردى.
اسكەرگە شاقىرىلۋشىلاردى جونەلتۋ كۇزگى اسكەرگە شاقىرۋ ناۋقانى اياسىندا جۇزەگە اسىرىلۋدا. بۇل جۇمىس قازاقستان رەسپۋبليكاسىنىڭ قارۋلى كۇشتەرى مەن باسقا دا اسكەرلەرىن جوسپارلى تۇردە جاساقتاۋعا باعىتتالعان.
ايتا كەتەيىك، كۇزگى اسكەرگە شاقىرۋ ناۋقانى اياسىندا شىمكەنت قالاسىنان 1300-دەن استام ازاماتتى مەرزىمدى اسكەري قىزمەتكە جىبەرۋ جوسپارلانعان. بۇگىنگى تاڭدا وڭىردەن ۇلتتىق قاۋىپسىزدىك كوميتەتىنىڭ شەكارا قىزمەتىنە 200-دەن استام، ال قازاقستان رەسپۋبليكاسى ىشكى ىستەر مينيسترلىگىنىڭ ۇلتتىق ۇلانىنا 250-گە جۋىق ازامات اتتاندى.
