Foto: J MILES CARY/REUTERS
AQŞ-tyŋ Tennessi ştatynda kısı öltırgenı üşın ölım jazasyna kesılgen Krista Paikqa qatysty ükımdı oryndau sätsız aiaqtalǧan bolatyn. Oǧan ölımge äkeletın ineksiia ekı ret jasalǧanymen, 50 jastaǧy äiel tırı qalǧan. Qazır ol auruhanada auyr jaǧdaida jatyr. Endı ölım jazasyn oryndau 2026 jyldyŋ soŋyna deiın toqtatyldy. Būl turaly BBC jazdy, dep habarlaidy «Adyrna».
Ükımdı oryndau kezınde Paikqa pentobarbital preparatynyŋ ekı dozasy salynǧan. Advokattarynyŋ mälımetınşe, onyŋ jürek soǧysy toqtamaǧan.
Oqiǧadan keiın Tennessi gubernatory Bill Li täuelsız tekseru jürgızudı tapsyrdy. Sonymen qatar ştatta ölım jazalaryn oryndau 2026 jyldyŋ soŋyna deiın toqtatyldy.
AP agenttıgınıŋ habarlauynşa, Tennessi ştatyndaǧy hattamada ekınşı ineksiiadan keiın de sottalǧan adam tırı qalǧan jaǧdaida qandai äreket jasau keregı naqty körsetılmegen.
Paikqa qatysty būdan ärı qandai şeşım qabyldanatyny äzırge belgısız.
Eske salaiyq, 1995 jyly 18 jastaǧy Krista Paik pen onyŋ serıktesı Tadaril Şipp Paiktyŋ 19 jastaǧy synyptasy Kollin Slemmerdı öltırgen. Bır jyldan keiın Paik bırınşı därejelı kısı öltırdı dep tanylyp, ölım jazasyna kesıldı. Al qylmys jasalǧan kezde 17 jasta bolǧan Şipp şartty türde merzımınen būryn bosatu mümkındıgı qarastyrylǧan ömır boiy bas bostandyǧynan aiyru jazasyn aldy.
Krista Paik AQŞ-tyŋ qazırgı tarihyndaǧy ölım jazasyna kesılgen eŋ jas äiel atandy. Is bükıl elde ülken rezonans tudyrdy, öitkenı Slemmerdıŋ mäiıtı keudesıne satanizmnıŋ simvoly sanalatyn pentagramma oiyp salynǧan küide tabylǧan.
Paiktyŋ advokattary oǧan keşırım jasaudy sūraǧan. Olardyŋ aituynşa, ol qylmysty nebärı 18 jasynda jasaǧan jäne anasynyŋ küieulerı tarapynan ūzaq jyldar boiy jynystyq zorlyq-zombylyq körıp, psihikalyq densaulyǧyna bailanysty qiyndyqtarǧa, sonyŋ ışınde bipoliarlyq būzylysqa şaldyqqan.
