AQŞ-tyŋ negızgı zymyran qory İranmen bes aiǧa sozylǧan soǧys barysynda aitarlyqtai azaiǧan. Äskeri basşylyq būl jaǧdai eldıŋ jaŋa qaqtyǧystarǧa daiyndyǧyna äser etuı mümkın ekenın eskerttı, dep habarlaidy «Adyrna» tılşısı CNN-ge sılteme jasap.
Telearnanyŋ mälımetınşe, AQŞ soǧysqa THAAD zymyranǧa qarsy keşenderınıŋ tosqauyldauşy zymyrandarynyŋ şamamen 80 paiyzyn jäne Patriot jüiesıne arnalǧan zymyrandardyŋ jartysyna juyǧyn paidalanyp qoiǧan. Äsırese äue şabuylyna qarsy qorǧanys qūraldarynyŋ qory qatty qysqarǧan.
CNN derekközderınıŋ aituynşa, oq-därı tapşylyǧy mäselesı ötken demalysta prezident Donald Tramptyŋ İranǧa jaŋa soqqylar jasaudan bas tartu turaly şeşımı qarsaŋynda taǧy da talqylanǧan. Äskeri basşylyq soŋǧy aptalarda kemınde ekınşı ret prezidentke qaru-jaraq qorynyŋ tez azaiyp bara jatqanyn eskertken.
Reuters agenttıgınıŋ öz derekközderıne süiengen mälımetıne säikes, AQŞ äskerı ūzaq qaşyqtyqqa arnalǧan joǧary däldıktegı ATACMS jäne Precision Strike Missile (PrSM) zymyrandarynyŋ da «ıs jüzınde barlyq» qoryn paidalanǧan. Agenttık sūhbattasuşylarynyŋ bırı būl zymyrandar İranǧa soqqy jasau kezınde belsendı qoldanylǧanyn, öitkenı olar pilot basqaratyn aviasiiany tartudy qajet etetın qauıptırek operasiialardan bas tartuǧa mümkındık bergenın aitqan.
Sondai-aq Reuters agenttıgınıŋ bır derekközı soǧys bastalǧaly berı AQŞ älemdık Tomahawk qanatty zymyrandary qorynyŋ şamamen jartysyn jūmsaǧanyn mälımgen.
Reuters saualyna jauap retınde Aq üi Donald Tramptyŋ mälımdemesın taratty. Onda AQŞ-ta «älemdegı kez kelgen elden äldeqaida köp oq-därı qory bar» ekenı aitylǧan. Sondai-aq amerikalyq qorǧanys käsıporyndary qaru-jaraqty rekordtyq qarqynmen öndırıp, öndırıstık quattaryn keŋeitıp jatqany habarlandy.
Pentagon da armiianyŋ jauyngerlık daiyndyǧyna qatysty alaŋdauşylyqtardy joqqa şyǧardy. Vedomstvo ökılı Şon Parnell CNN men Reuters agenttıkterıne AQŞ qaruly küşterınde prezident jükteitın kez kelgen mındettı oryndauǧa qajettı barlyq qūral bar ekenın jäne qaru-jaraq qorynyŋ älı de edäuır kölemde saqtalǧanyn mälımdedı.
Būǧan deiın Bloomberg Pentagonnyŋ Kongreske tosqauyldauşy zymyran qoryn tolyqtyru üşın 18,2 milliard dollar bölu jönınde sūranys joldaǧanyn jazǧan bolatyn. Būl qarajat būǧan deiın ūsynylǧan 67 milliard dollar kölemındegı qosymşa qarjylandyru paketınıŋ bır bölıgı sanalady. Derekközderdıŋ mälımetınşe, AQŞ äskeri basşylyǧy eldegı oq-därı qorynyŋ «qauıptı deŋgeide azaiyp ketkenıne» alaŋdauly.
2 tamyz, jeksenbı künı Donald Tramp İran men Taiau Şyǧystyŋ basqa da elderı kelısımnıŋ negızgı parametrlerı boiynşa ortaq mämılege qol jetkızılgendıkten, Vaşingtonnan jaŋa soqqylardan bas tartudy sūraǧanyn mälımdegen edı. Sonymen qatar ol AQŞ-tyŋ İranǧa qarsy Ekınşı düniejüzılık soǧystan berı bolmaǧan auqymdaǧy küş qoldanuǧa tolyq daiyn ekenın atap öttı.
AQŞ pen İran arasyndaǧy soǧys 2026 jyldyŋ aqpanynda bastalǧan. Mausym aiynda taraptar atysty toqtatu turaly kelısımge kelgenımen, bıtım ūzaqqa sozylmai, bırneşe aptadan keiın äskeri äreketter qaita jalǧasqan bolatyn.
