QR Syrtqy ıster ministrı Mūhtar Tıleuberdı Reseidıŋ Qazaqstandaǧy Uaqytşa senımdı ökılı Aleksandr Komarovpen kezdestı. Būl turaly SIM 2 qazanda habarlady, dep jazady “Adyrna”.
Kezdesude soǧys qimyldary aimaǧynda qalǧan Qazaqstan azamattarynyŋ jaǧdaiy talqylandy.
Taraptar qazaqstandyq azamattardy elge qaitaru boiynşa bırlesken ıs-qimyldardy äzırleu turaly uaǧdalasty.
Osydan keiın QR SIM vedomstvonyŋ resmi ökılı Janbolat Üsenovtıŋ mälımdemesın jariialady.
Onyŋ aituynşa, būqaralyq aqparat qūraldarynda Qazaqstan azamattarynyŋ elge oraluyna kömek körsetu turaly ötınışterı taralyp jatyr.
«Syrtqy ıster ministrlıgı būl jaǧdaiǧa barynşa baiyppen qaraidy. Şeteldegı Qazaqstan azamattarynyŋ qūqyqtaryn, bostandyqtary men zaŋdy müddelerın qorǧau – ministrlık qyzmetınıŋ sözsız basymdyǧy. Qazaqstan Respublikasynyŋ SIM älemnıŋ türlı elderı men öŋırlerındegı soǧys aimaqtarynan otandastarymyzdy qaitaru boiynşa praktikalyq täjıribege ie», – dedı Janbolat Üsenov.
Onyŋ mälımdemesınde Qazaqstan azamattary turaly tolyq ärı naqty aqparatty būqaralyq aqparat qūraldarynan emes, olardyŋ özderınen nemese tuystarynan tıkelei alu maŋyzdy ekenı atap ötılgen. Qazırdıŋ özınde keibır otbasylar ministrlıkke kömek körsetu turaly ötınışpen jügıngen.
QR SIM äskeri qimyldar aimaǧynda qalǧan qazaqstandyqtardyŋ tuystarynan ötınışter qabyldau üşın arnaiy jedel jelı jūmys ısteitının habarlady.
«Azamattardyŋ qūqyqtyq qorǧaluyn qamtamasyz etu üşın ministrlıkke olardyŋ aty-jönı, tuǧan künı, boljamdy ornalasqan jerı, sondai-aq jasalǧan eŋbek kelısımşarttarynyŋ talaptary turaly mälımetterdı qosa alǧanda, tolyq aqparat qajet», – delıngen habarlamada.
Qazırgı uaqytta SIM qazaqstandyqtardy elge qaitaru boiynşa bırlesken şaralardy äzırleu üşın Resei tarapymen konsultasiialardy jalǧastyryp jatyr.
Jaqyn uaqytta Qazaqstannyŋ Reseidegı elşısı Resei Syrtqy ıster ministrlıgı men Qorǧanys ministrlıgınıŋ basşylyǧymen kezdesuler ötkızedı.
Ministrlık jürgızılıp jatqan jūmystyŋ barysy men nätijelerı turaly qosymşa aqparat berıletının mälımdedı.
