Oralbaı MERGENBAIULY: Baıden aıtqan soǵystyń bastalýyna bir kún qaldy

3229
Adyrna.kz Telegram

Amerıkalyq barlaýshylardyń boljamyna sensek, Ýkraınada soǵys dál erteń bastalýy kerek.

Kóptegen áýe kompanııalary Ýkraına ústimen ushpaýǵa sheship qabyldap, reısterin doǵaryp jatyr. Aıtalyq, Gollandııalyq KLM áýe kompanııasy Ýkraınaǵa avıaııalyq reısterin toqtatty. Ýkraınanyń SkyUp charterlik áýe kompanııasy jeksenbi kúni óziniń Madeıradan Kıevke attanǵan ushaǵynyń Moldova astanasyna burylǵanyn habarlady. Ýkraınanyń «Ýkraerorýh» áýe qozǵalysy qaýipsizdigi agenttigi de málimdeme jasap, Qara teńiz aspanyn «qaýipti aımaq» dep jarııalap, ushaqtarǵa 14-19 aqpan kúnderi osy teńizdiń ústinen ushýdan aýlaq bolýǵa keńes berdi.

Kıev áskerıleri bolsa toıtarys berýge saqadaı saı.

Prezıdent Vladımır Zelenskıı halqyna úndeý jarııalap úlgerdi. Tipti Prezıdent Djo Baıdenmen bir saǵatqa jýyq sóılesip, senimdi qorǵanysta ekenin jetkizdi.

Al Baıden ákimshiligi búı deıdi, Reseı seısenbi kúni Ýkraınanyń shyǵysynda josparlanǵan áskerı jattyǵýlardy nysanaǵa alyp, soǵysqa kirisýi yqtımal. Biraq bul naqty aqpar emes.

Baıdenniń baılamynsha, Ýkraına shekarasy mańyna shoǵyrlanǵan reseılik kúshterdiń sany 130 000-nan asyp ketken. Ótken aptada ǵana olardyń qatary 100 myńnan aspaıtyn. Alaıda Zelenskıı Pýtınniń basqynshylyq áreketke baratynyna kúmánmen qarap otyr.

«Reseıge bul jerde tosyn syı jasaýǵa múmkindik bermeımiz. Biz álemge kórgen jaıttarymyzdy múmkindiginshe anyq etip baıandaýdy oılaımyz», – dedi AQSh-tyń ulttyq qaýipsizdik jónindegi keńesshisi Djeık Sallıvan.

Odaqtasymyz Reseı tarapy bolsa Ýkraına mańyna jáne Belarýssııaǵa áskerı kúshterin ornalastyryp álek.

Pýtın burynǵysynsha Ýkraınany NATO-ǵa kirgizbeýdi talap etse, Batys bul talaptardy oryndaýǵa úzildi-kesildi qarsy. Áıteýir kók sary baıraqtylar «eki túıe súıkense arasynda shybyn ólediniń» kúıin keshpese bolǵany.

Reseı basylymdarynyń sózine qulaq túrsek, Baıden soǵysty jeleýletip Reseıge edáýir jaqyndaýǵa múddeli kórinedi.

Qysqasy, bolmaǵan isti boldy dep, eldiń úreıin ushyrmaı erteńgi kúndi kútelik!

Oralbaı MERGENBAIULY,

"Adyrna" ulttyq portaly

Pikirler