Bügın qazaq kinosynyŋ körnektı ökılı, rejisser Abdolla Qarsaqbaevtyŋ tuǧanyna 100 jyl toldy.
Abdolla Qarsaqbaev 1926 jyly 2 qazanda Almaty oblysynyŋ Jambyl audanynda düniege kelgen. Ol qazaq kinosynyŋ damuyna eleulı üles qosyp, äsırese balalar men jasöspırımderge arnalǧan filmderımen tanyldy.
Rejisserdıŋ şyǧarmaşylyq jolyndaǧy eŋ tanymal tuyndylarynyŋ bırı — «Menıŋ atym Qoja» filmı. 1963 jyly tüsırılgen kartina Berdıbek Soqpaqbaevtyŋ povesı negızınde ekranǧa şyqty. Filmde mektep oquşysy Qojanyŋ ömırı, mınezı, dostary men qorşaǧan ortasy suretteledı.
«Menıŋ atym Qoja» kartinasy qazaq balalar kinosynyŋ klassikalyq tuyndylarynyŋ bırıne ainaldy. Film 1967 jyly Kann halyqaralyq kinofestivalınıŋ balalar men jasöspırımderge arnalǧan filmder baiqauynda jüldege ie boldy.
Abdolla Qarsaqbaev 1947 – 1983 jyly «Qazaqfilm» studiiasynda rejissery bolyp «Ana men bala» (1955), «Eger bızdıŋ bärımız de...» (1961, ekeuın de rej. S.Qojyqovpen bırge), «Qanatty syilyq» (1956, A.Slobodnik jäne E.İ. Faikpen bırge), «Botagöz» (1957, E.E. Aronmen bırge) atty körkem filmderdı qoiuǧa qatysty.
Tarihi taqyrypqa «Qily kezeŋ» (1968), «Daladaǧy quǧyn» (1979, KSRO HŞJK-nıŋ kümıs medalı) sekıldı filmderdı, «Menıŋ atym Qoja» (1963, T.Düisenbaevpen bırge, 1964 jyly ötken Ortalyq Aziia men Qazaqstan kinematografiiaşylarynyŋ baiqauynyŋ jäne 1967 jyly Kann qalasynda ötkızgen halyqaralyq kinofestivaldyŋ diplomyna ie boldy).
«Balalyq şaqqa saiahat» (1969), «Menıŋ aǧam» (1972), «Qataryŋnan qalma» (1974, telefilm); «Ou, kovboilar» (1975), «Alty jasar Alpamys» (1976; 1977 jyly Rigada ötken Bükılodaqtyq 10 kinofestivaldıŋ jüldegerı), «Balalyq şaqtyŋ kermek dämı» (1982) körkem filmderın, sonymen qatar «Qazaq halqynyŋ qolönerı» (1958), «Torǧai şegı» (1963), «Cherkassk qorǧany» (1970), «Aqtöbe» (1972), t.b. derektı filmderın qoiǧan.
«Bırınşıden, men balalar turaly film ǧana emes, ülkenderge de arnalǧan bırneşe kartina tüsırgenmın. Degenmen, jūmystarymnyŋ basym köpşılıgı balalarǧa arnalǧan. Sol sebeptı de menı balalar özderıne tolyq enşılep alsa kerek. Oǧan men quanbasam, renjımeimın. Öitkenı, men balalyq şaǧymdy saǧynamyn. Bügıngı ūrpaqpen jūmys ısteuge sonşalyqty qūştarmyn», - degen eken Abdolla Qarsaqbaev közı tırısınde.
Qarsaqbaevtyŋ rejisserlık qoltaŋbasynyŋ erekşelıgı – keiıpkerlerdı tabiǧi qalpynda körsetuı jäne balalardyŋ ışkı älemın şynaiy jetkızuı. Onyŋ filmderı bırneşe buyn körermenınıŋ süiıktı tuyndylaryna ainaldy.
1978 jyly Qazaqstannyŋ Eŋbek sıŋırgen öner qairatkerı ataǧyn aldy. 1983 jyly 2 qyrküiekte dünieden öttı.
