Fransiiada mektep oquşylarynyŋ narazylyq aksiialary keŋeiıp, kei öŋırlerde qaitadan polisiiamen qaqtyǧysqa ūlasty. Būl turaly 30 qyrküiek künı keşke AFP agenttıgı jazdy, dep habarlaidy «Adyrna» tılşısı.
Eldıŋ ışkı ıster ministrı Loran Nunestıŋ mälımetınşe, narazylyq şaralary 356 mekteptı qamtyǧan. Bır kün būryn mūndai mektepterdıŋ sany 338 bolǧan. Tärtıpsızdıkter bastalǧaly berı 625 adam ūstalyp, 83 polisiia qyzmetkerı men jandarm jaraqat alǧan.
Parijdegı bılım ministrlıgı ötken aptadan berı jalǧasyp jatqan narazylyqtar saldarynan 119 oquşy men 34 mektep qyzmetkerınıŋ zardap şekkenın mälımdedı. Vedomstvo basşysy Eduar Jeffre būl jaǧdaidy «bılım beru salasyndaǧy būryn-soŋdy bolmaǧan oqiǧa» dep atady. Fransiiada jalpy sany şamamen 3700 mektep jūmys ısteidı.
Narazylyqtar alǧaşynda Parij aimaǧyndaǧy İl-de-Frans öŋırınde bastalyp, keiın bükıl elge tarady. Joǧary synyp oquşylary synyptardyŋ şamadan tys tolyp ketuıne, mūǧalımderdıŋ jetıspeuıne, bılım beru mekemelerınıŋ naşar jaǧdaiyna jäne oqu kestesınıŋ tym auyr ekenıne narazylyq bıldırude.
Keibır ırı qalalarda aksiialar polisiiamen qaqtyǧysqa ūlasqan. Jekelegen jaǧdailarda narazylyq bıldıruşıler janǧyş qospa qūiylǧan bötelkeler men tastar paidalanǧan. Būǧan jauap retınde polisiia közden jas aǧyzatyn gaz qoldandy.
Fransiia prezidentı Emmaniuel Makron köptegen jastyŋ «alaŋdauşylyǧy men aşu-yzasyn» tüsınetının aitty. Alaida ol būl mäselelerdıŋ eşqaisysy zorlyq-zombylyqty aqtai almaitynyn atap öttı.
Fransiia ükımetı oquşylar özderınıŋ «alaŋdauşylyqtary men talaptaryn» bıldıre alatyn arnaiy keŋes beru platformasyn qūratynyn jariialady. Būl platforma 6 qazannan keşıktırılmei ıske qosyluy tiıs. Odan keiın bilık eldegı jaǧdaiǧa jan-jaqty taldau jürgızudı josparlap otyr.
«Bız qandai jaǧdai bolsa da oquşylardyŋ oqu üderısıne qaita oraluyn qamtamasyz etuımız kerek», – dedı öz kezegınde Bılım ministrlıgınıŋ basşysy.
AFP mälımetınşe, solşyl-populistık «Baǧynbaityn Fransiia» (La France Insoumise) partiiasy oquşylardyŋ narazylyq qozǧalysyn qoldap otyr. Partiia jetekşısı Jan-Liuk Melanşon öz saiasi küşınıŋ tek beibıt narazylyq türlerın qoldaitynyn mälımdedı.
