فرانتسيادا مەكتەپ وقۋشىلارىنىڭ نارازىلىق اكتسيالارى كەڭەيىپ، كەي وڭىرلەردە قايتادان پوليتسيامەن قاقتىعىسقا ۇلاستى. بۇل تۋرالى 30 قىركۇيەك كۇنى كەشكە AFP اگەنتتىگى جازدى، دەپ حابارلايدى «ادىرنا» ءتىلشىسى.
ەلدىڭ ىشكى ىستەر ءمينيسترى لوران نۋنەستىڭ مالىمەتىنشە، نارازىلىق شارالارى 356 مەكتەپتى قامتىعان. ءبىر كۇن بۇرىن مۇنداي مەكتەپتەردىڭ سانى 338 بولعان. تارتىپسىزدىكتەر باستالعالى بەرى 625 ادام ۇستالىپ، 83 پوليتسيا قىزمەتكەرى مەن جاندارم جاراقات العان.
پاريجدەگى ءبىلىم مينيسترلىگى وتكەن اپتادان بەرى جالعاسىپ جاتقان نارازىلىقتار سالدارىنان 119 وقۋشى مەن 34 مەكتەپ قىزمەتكەرىنىڭ زارداپ شەككەنىن مالىمدەدى. ۆەدومستۆو باسشىسى ەدۋار جەففرە بۇل جاعدايدى ء«بىلىم بەرۋ سالاسىنداعى بۇرىن-سوڭدى بولماعان وقيعا» دەپ اتادى. فرانتسيادا جالپى سانى شامامەن 3700 مەكتەپ جۇمىس ىستەيدى.
نارازىلىقتار العاشىندا پاريج ايماعىنداعى يل-دە-فرانس وڭىرىندە باستالىپ، كەيىن بۇكىل ەلگە تارادى. جوعارى سىنىپ وقۋشىلارى سىنىپتاردىڭ شامادان تىس تولىپ كەتۋىنە، مۇعالىمدەردىڭ جەتىسپەۋىنە، ءبىلىم بەرۋ مەكەمەلەرىنىڭ ناشار جاعدايىنا جانە وقۋ كەستەسىنىڭ تىم اۋىر ەكەنىنە نارازىلىق بىلدىرۋدە.
كەيبىر ءىرى قالالاردا اكتسيالار پوليتسيامەن قاقتىعىسقا ۇلاسقان. جەكەلەگەن جاعدايلاردا نارازىلىق بىلدىرۋشىلەر جانعىش قوسپا قۇيىلعان بوتەلكەلەر مەن تاستار پايدالانعان. بۇعان جاۋاپ رەتىندە پوليتسيا كوزدەن جاس اعىزاتىن گاز قولداندى.
فرانتسيا پرەزيدەنتى ەممانيۋەل ماكرون كوپتەگەن جاستىڭ «الاڭداۋشىلىعى مەن اشۋ-ىزاسىن» تۇسىنەتىنىن ايتتى. الايدا ول بۇل ماسەلەلەردىڭ ەشقايسىسى زورلىق-زومبىلىقتى اقتاي المايتىنىن اتاپ ءوتتى.
فرانتسيا ۇكىمەتى وقۋشىلار وزدەرىنىڭ «الاڭداۋشىلىقتارى مەن تالاپتارىن» بىلدىرە الاتىن ارنايى كەڭەس بەرۋ پلاتفورماسىن قۇراتىنىن جاريالادى. بۇل پلاتفورما 6 قازاننان كەشىكتىرىلمەي ىسكە قوسىلۋى ءتيىس. ودان كەيىن بيلىك ەلدەگى جاعدايعا جان-جاقتى تالداۋ جۇرگىزۋدى جوسپارلاپ وتىر.
ء«بىز قانداي جاعداي بولسا دا وقۋشىلاردىڭ وقۋ ۇدەرىسىنە قايتا ورالۋىن قامتاماسىز ەتۋىمىز كەرەك»، – دەدى ءوز كەزەگىندە ءبىلىم مينيسترلىگىنىڭ باسشىسى.
AFP مالىمەتىنشە، سولشىل-پوپۋليستىك «باعىنبايتىن فرانتسيا» (La France Insoumise) پارتياسى وقۋشىلاردىڭ نارازىلىق قوزعالىسىن قولداپ وتىر. پارتيا جەتەكشىسى جان-ليۋك مەلانشون ءوز ساياسي كۇشىنىڭ تەك بەيبىت نارازىلىق تۇرلەرىن قولدايتىنىن مالىمدەدى.
