Almatydaǧy Sätbaev köşesınde velojolaqtyŋ kögalǧa tırelıp aiaqtaluy jelı nazaryn audartty, dep habarlaidy “Adyrna”.
Būǧan qatysty qoǧamdyq keŋıstıkterdı damytu basqarmasy tüsınıkteme berdı.
Äleumettık jelıde qala tūrǧyny Sätbaev köşesındegı, Satbayev University maŋynda ornalasqan velojolaqtyŋ aiaqtalǧan tūsynyŋ suretın jariialaǧan. Kadrda velojolaqtyŋ üzılıp, trotuar men kögalǧa jalǧasyp ketkenı körınedı.
Jariialanym äleumettık jelı qoldanuşylary arasynda qyzu talqylanyp, tūrǧyndar jaǧdaiǧa qatysty türlı pıkır bıldırgen.
Basqarmanyŋ mälımetınşe, atalǧan uchaskedegı jūmystar älı tolyq aiaqtalmaǧan.
«Qazır merdıger ūiym jūmysty atalǧan uchaskege deiın jetkızdı. Tūrǧyndarǧa qolaisyzdyqty azaitu qajettılıgın eskere otyryp, jūmystar qūrylys barysyna qarai kezeŋ-kezeŋımen oryndalyp jatyr», – dep habarlady vedomstvo.
Basqarma mälımetınşe, velojolaq batys baǧytta Baitūrsynov köşesıne deiın jalǧasady. Būl üşın qoldanystaǧy trotuar keŋeitılıp, onyŋ bır bölıgı velojolaq retınde qaita jabdyqtalady.
