Almaty äkımı Darhan Satybaldy almatylyqtardy Qala künımen qūttyqtap, aituly merekege orai ūiymdastyrylǧan Alma Qala Fest festivalın aşty.
Qala tūrǧyndary men qonaqtary LED-ekrannan jaŋaryp, körkeiıp kele jatqan äsem Almatynyŋ jetıstıkterın tamaşalady.
«Almaty qalasynyŋ tarihi orny airyqşa mänge ie. Barşaŋyzdy Qala künımen şyn jürekten qūttyqtaimyn! Soŋǧy uaqytta almatylyqtar Qazaqstanda ötken halyqtyq Konstitusiiany qabyldau, Ūlttyq Qūryltai sailauy sekıldı ırı saiasi reformalardy belsendı qoldady.
XXI ǧasyr – megapolister däuırı. Altyn qala ömır süruge qolaily orta, bizneske qolaily ahual, turister üşın jasalǧan jaǧdai jäne ziiatkerlık startaptarǧa berıletın mümkındıkter arqyly bäsekege tüsedı. Basqaşa aitqanda, älemdık bäseke qalalar deŋgeiıne auysty», – dedı Almaty äkımı.
Ol uaqyt öte talaptyŋ küşeie tüsetının atap ötıp, qala tūrǧyndaryn Almatyny bırge damytuǧa jäne körkeituge şaqyrdy.
Saltanatty ıs-şarada Almaty äkımı Darhan Amangeldıūly qalanyŋ damuyna erekşe ız qaldyrǧan körnektı azamattardy marapattap, olardyŋ Almatynyŋ qalyptasuy men örkendeuıne qosqan ülesın atap ötıp, qala tūrǧyndarynyŋ atynan alǧys bıldırdı.
«Qūrmettı almatylyqtar, özderıŋız bıletındei, qalamyzdyŋ damuyna üles qosqan azamattarǧa berıletın «Qūrmettı azamat» ataǧy bar. Almatyda bıraz uaqyt boiy būl qūrmettı ataqty beru toqtatylǧan edı. Biyldan bastap «Qalanyŋ Qūrmettı azamaty» ataǧyn tabystaudy qaita jaŋǧyrttyq. Osyǧan bailanysty bügın qalamyzdyŋ damuyna eleulı üles qosqan bırqatar tūrǧyndy marapattap otyrmyn», – dedı qala äkımı.
«Almaty qalasynyŋ Qūrmettı azamaty» ataǧyna eŋbek ardagerı Gainiken Bibatyrova, körnektı qūrylysşy-injener Klara Letnikova, keskındemeşı-suretşı Amandos Aqanaev, säuletşı Orysbai Baimyrzaev, täjıribelı därıger Orynbai Daiyrbekov, ǧalym-hirurg Bolatbek Baimahanov, «Almatylift» JŞS direktory Qaldybai Qazanbaev, «Almaty tazalyq» MKK bas injenerı Aleksandr Kin, Qazaqstan Respublikasynyŋ eŋbek sıŋırgen jattyqtyruşysy Ämin Tūiaqov, körnektı skripkaşy, dirijer ärı kompozitor Mūrat Serkıbaev ie boldy.
Qūrmettı ataqqa ie bolǧan «Almatylift» JŞS direktory Qaldybai Qazanbaev Almatynyŋ erekşe ruhyn atap ötıp, qala tūrǧyndaryna alǧysyn bıldırdı:
«Prezidenttıŋ Almatyda tuǧanyna ǧana bailanysty emes şyǧar, äkım aitqandai, bızde almatylyq ruh bar. Ol ärdaiym qalamyzdy körkeituge kömektesıp keledı. Barlyq almatylyqqa amandyq pen baqyt tıleimın».
«Bügın, osynau merekelı künı, qūrmettı almatylyqtar, sızderge zor alǧysymdy bıldıremın. Qalamyzdy tartymdy ortalyqqa ainaldyrǧan – özderıŋız. Men 23 jyl boiy osy qalany damytu jäne körkeitu jūmystaryna tıkelei atsalystym. Bıraq bır künı osy sahnada tūryp, «Almaty qalasynyŋ Qūrmettı azamaty» degen joǧary ataqqa ie bolamyn dep eşqaşan oilaǧan emespın. Menıŋşe, būl jai ǧana marapat emes, sonymen bırge köpjyldyq täjıribemdı jastarǧa jetkızuge, bölısuge ülken serpın beredı. Qalamyzdy aldaǧy uaqytta da bırge damytyp, körkeite bereiık», – dedı Eŋbek Qyzyl Tu jäne «Qūrmet» ordenderınıŋ iegerı Klara Letnikova.
Almatynyŋ tarihy – onyŋ körıktı köşelerı men zäulım ǧimarattarynyŋ tarihy ǧana emes. Būl osy qalaǧa bar jüregımen qyzmet etken adamdardyŋ tarihy. Al «Qūrmettı azamat» ataǧy – sol eŋbektıŋ qoǧam aldyndaǧy jarqyn moiyndaluy.
Saltanatty keştıŋ sänın Altynbek Qorazbaev, Jūbanyş Jeksenūly, Jeŋıs Seidollaūly jäne Mädina Säduaqasova sekıldı otandyq estrada jūldyzdarynyŋ konsertı tolyqtyrdy.
Aita keteiık, Alma Qala Fest festivalı ekı künge jalǧasady. Qazırgı uaqytta Abai alaŋynda «Alma aimaǧy», «Şeberler qalaşyǧy», balalar jäne kraft oiyndar aimaǧy, AI & ROBOT ZONE jäne fud-kort jūmys ıstep tūr.
