Prezident Qasym-Jomart Toqaevtyŋ tapsyrmasymen Mädeniet jäne aqparat ministrı Arman Qyryqbaev Tedjon qalasyndaǧy memorialdyq keşenge baryp, sonda jerlengen körnektı korei qolbasşysy, general Hon Bom Donyŋ ruhyna taǧzym ettı, dep habarlaidy «Adyrna» tılşısı.
Aita keteiık, ministr Koreia Respublikasyna memlekettık saparmen barǧan Memleket basşysy bastaǧan resmi delegasiia qūramynda.
Keşende qūrmet qarauylynyŋ qatysuymen arnaiy räsım öttı. Arman Qyryqbaev el täuelsızdıgı jolynda küresıp, Otanyn qorǧauǧa ǧūmyryn arnaǧan jandarǧa qūrmet bıldırıp, memorialǧa gül şoǧyn qoidy. Sondai-aq general Hon Bom Donyŋ ruhyna taǧzym ettı.
Tedjondaǧy būl memorialdyq keşen Koreia Respublikasyndaǧy asa maŋyzdy taǧzym oryndarynyŋ bırı sanalady. Mūnda elge airyqşa eŋbek sıŋırgen 150 myŋǧa juyq adam mäŋgılık tynys tapqan. General Hon Bom Donyŋ esımı Qazaqstan men Koreiany bailanystyratyn ortaq tarihta airyqşa oryn alady. Ol ömırınıŋ soŋǧy jyldaryn Qazaqstanda ötkızıp, Qyzylordada jerlengen edı. 2021 jyly Qazaqstannyŋ qoldauymen onyŋ süiegı atamekenıne jetkızılıp, Tedjonda qaita jerlendı.
Biyl general Hon Bom Donyŋ süiegı Qyzylordadan Koreia Respublikasyna jetkızılgenıne bes jyl tolady. Onyŋ taǧdyr joly ekı halyqty özara jaqyndastyrǧan ortaq tarihtyŋ taǧylymdy bır belesıne ainaldy.
Sapar soŋynda Arman Qyryqbaev qūrmettı qonaqtar kıtabyna estelık jazba qaldyrdy. Memorialdyq keşendegı būl räsım ekı eldıŋ tarihi mūrasyna degen qūrmettı aiǧaqtap, Qazaqstan men Koreia arasyndaǧy bailanysty odan ärı nyǧaitudyŋ maŋyzyn körsettı.
