Iemendegı «Ansar Allah» qozǧalysy, iaǧni husitter Qyzyl teŋızdıŋ oŋtüstıgındegı Haniş arhipelagyn baqylauyna aldy. Būl turaly Associated Press Iemen bilıgı ökılderı men husitter arasyndaǧy derekközderge sılteme jasap jariialady, dep habarlaidy “Adyrna”.
Aqparatqa säikes, husitter Bab-el-Mandeb būǧazynan şamamen 160 şaqyrym jerde ornalasqan araldarǧa öz küşterın ornalastyrǧan. Būǧan deiın arhipelagta bolǧan ükımettı qoldaityn jüzdegen sarbaz araldardan ketken.
Husitter Ülken Haniş pen Kışı Haniş araldaryn baqylauyna alǧan. Būǧan deiın qozǧalys arhipelagtyŋ soltüstıgındegı Zukar aralyn da basyp alǧan edı. Osylaişa Qyzyl teŋızdegı strategiialyq maŋyzy bar bırneşe aral husitterdıŋ baqylauyna öttı.
Sarapşylar būl jaǧdaidy Iemendegı qaqtyǧystyŋ jaŋa kezeŋı retınde baǧalap otyr. Associated Press mälımetınşe, «Ansar Allah» soŋǧy jyldary Iemen aumaǧynda eŋ ırı aumaqtyq jetıstıkterınıŋ bırıne qol jetkızdı. Būl İranǧa AQŞ-pen teketıres jaǧdaiynda aimaqtaǧy yqpalyn küşeituge qosymşa mümkındık beruı mümkın.
Alaida Tegeran husitterdıŋ äreketıne qatysy bar ekenın joqqa şyǧarady. İran Syrtqy ıster ministrlıgınıŋ ökılı İsmail Bagai Iemendegı oqiǧalarǧa Tegerannyŋ qatysy joq ekenın mälımdedı.
Iemendegı azamattyq qaqtyǧys 2014 jyly bastalǧan. 2022 jyldan bastap elde salystyrmaly türde tynyş kezeŋ qalyptasqanymen, 2026 jyldyŋ şıldesınen berı ükımet küşterı men husitter arasyndaǧy qaruly qaqtyǧystar qaita küşeidı.
Ötken aptada husitter auqymdy şabuyl operasiiasyn jürgızıp, Iemennıŋ Qyzyl teŋız jaǧalauyndaǧy aumaqtardy, Bab-el-Mandeb būǧazyna ırgeles jerlerdı, sondai-aq Perim jäne Zukar araldaryn baqylauyna alǧan.
Haniş arhipelagynyŋ qolǧa ötuı aimaq üşın strategiialyq maŋyzǧa ie. Araldar Qyzyl teŋızdegı maŋyzdy teŋız joldaryna jaqyn ornalasqan jäne Bab-el-Mandeb būǧazyna jaqyn ornalasuy olardyŋ äskeri-strategiialyq maŋyzyn arttyrady.
