Йемендегі «Ансар Аллах» қозғалысы, яғни хуситтер Қызыл теңіздің оңтүстігіндегі Ханиш архипелагын бақылауына алды. Бұл туралы Associated Press Йемен билігі өкілдері мен хуситтер арасындағы дереккөздерге сілтеме жасап жариялады, деп хабарлайды “Адырна”.
Ақпаратқа сәйкес, хуситтер Баб-эль-Мандеб бұғазынан шамамен 160 шақырым жерде орналасқан аралдарға өз күштерін орналастырған. Бұған дейін архипелагта болған үкіметті қолдайтын жүздеген сарбаз аралдардан кеткен.
Хуситтер Үлкен Ханиш пен Кіші Ханиш аралдарын бақылауына алған. Бұған дейін қозғалыс архипелагтың солтүстігіндегі Зукар аралын да басып алған еді. Осылайша Қызыл теңіздегі стратегиялық маңызы бар бірнеше арал хуситтердің бақылауына өтті.
Сарапшылар бұл жағдайды Йемендегі қақтығыстың жаңа кезеңі ретінде бағалап отыр. Associated Press мәліметінше, «Ансар Аллах» соңғы жылдары Йемен аумағында ең ірі аумақтық жетістіктерінің біріне қол жеткізді. Бұл Иранға АҚШ-пен текетірес жағдайында аймақтағы ықпалын күшейтуге қосымша мүмкіндік беруі мүмкін.
Алайда Тегеран хуситтердің әрекетіне қатысы бар екенін жоққа шығарады. Иран Сыртқы істер министрлігінің өкілі Исмаил Багаи Йемендегі оқиғаларға Тегеранның қатысы жоқ екенін мәлімдеді.
Йемендегі азаматтық қақтығыс 2014 жылы басталған. 2022 жылдан бастап елде салыстырмалы түрде тыныш кезең қалыптасқанымен, 2026 жылдың шілдесінен бері үкімет күштері мен хуситтер арасындағы қарулы қақтығыстар қайта күшейді.
Өткен аптада хуситтер ауқымды шабуыл операциясын жүргізіп, Йеменнің Қызыл теңіз жағалауындағы аумақтарды, Баб-эль-Мандеб бұғазына іргелес жерлерді, сондай-ақ Перим және Зукар аралдарын бақылауына алған.
Ханиш архипелагының қолға өтуі аймақ үшін стратегиялық маңызға ие. Аралдар Қызыл теңіздегі маңызды теңіз жолдарына жақын орналасқан және Баб-эль-Мандеб бұғазына жақын орналасуы олардың әскери-стратегиялық маңызын арттырады.
