Memleket basşysynyŋ tıkelei tapsyrmasymen qūrylǧan tūŋǧyş jasandy intellekt universitetı — Qazaq AI Research University (QAIRU) özınıŋ alǧaşqy oqu jylyn resmi türde bastady. Astana Hub alaŋynda ötken baspasöz konferensiiasynda JOO basşylyǧy men ministrlık ökılderı oqu formaty, superkompiuter resurstary, infraqūrylymdyq jobalar men halyqaralyq serıktestıkter turaly aityp berdı.
Ǧylym jäne joǧary bılım vise-ministrı Dinara Şeglovtyŋ aituynşa, būrynnan bar JOO-lardy qaita qūrudan görı, jaŋa prosesterdı «nölden» bastau äldeqaida tiımdı. Universitet rektory Sapar Toksanov JOO sanǧa emes, sapaǧa basymdyq beretının jetkızdı: jyl saiyn 400 bakalavr jäne 100 magistrant qabyldanady. Oqu baǧdarlamasy 3 jylǧa eseptelgen, bıraq qysqartylmaǧan — kerısınşe trisemestrlık jüie arqyly tyǧyzdalǧan: jylyna üş semestr ötıledı, osynyŋ nätijesınde studentter standartty 240 kredittı tolyq kölemde 3 jylda igeredı. Baǧdarlamanyŋ negızınde — bır diplomdyq AI-joba: 1-kursta mäsele anyqtalyp, MVP daiyndalady, 2-kursta jūmys ısteitın AI-servis äzırlenedı, al 3-kursta studentter daiyn AI-önımdı qorǧap, diplom alady. Oqu baǧdarlamalary Google jäne Samsung siiaqty tehnologiialyq giganttardyŋ baǧdarlamalarymen kırıktırılgen.
Rektor Sapar Toksanov būl jai ǧana oqu orny emes, akademiialyq, zertteu, biznes-blok jäne ūlttyq AI-platformadan tūratyn tūtas ekosistema ekenın atap öttı. Universitet Ministrlık bekıtken «AI+X» ūlttyq modelın ūstanady — būl IT mamandarymen qatar, ekonomikanyŋ özge de maŋyzdy salalaryna, atap aitqanda önerkäsıp, auyl şaruaşylyǧy, medisina jäne qarjy salalaryna jasandy intellekttı engıze alatyn qos kompetensiialy mamandar daiarlauǧa baǧyttalǧan.
Jasandy intellekt jäne sifrlyq damu vise-ministrı Ǧizzat Baitūrsynov baspasöz konferensiiasynda eldıŋ tehnologiialyq saladaǧy erekşe jetıstıgıne toqtaldy. Onyŋ aituynşa, jaŋartylǧan TOP-500 älemdık reitingınde Qazaqstan tarihynda alǧaş ret öz superkompiuterı bar elder qataryna endı — «Alem Cloud» jüiesı reitingte 86-oryndy ielendı. Vise-ministr būl esepteu quatynyŋ tek QAIRU üşın ǧana emes, bükıl Qazaqstan boiynşa oqu oryndarynyŋ ǧylymi-zertteu jäne oqu jūmystaryna qoldanylatynyn atap öttı. Jaŋadan aşylǧan universitetke öz jüktemesı üşın arnaiy 20 GPU bölıngenın, al oqu jyly bastalǧannan keiın būl kölemnıŋ odan ärı ūlǧaitylatynyn jetkızdı.
Ǧizzat Baitūrsynov sondai-aq elımızdegı AT-naryq pen startaptarda esepteu quattaryna tapşylyq tuyndau qaupı bar ekenın moiyndady. Osy täuekeldıŋ aldyn alu maqsatynda Prezidenttıŋ tapsyrmasymen derekterdı öŋdeu baǧdarlamasy ıske qosylǧanyn habarlady. Osy baǧdarlama aiasynda Payvert jäne NVIDIA siiaqty älemdık kompaniialarmen 250 MVt quattylyqtaǧy derekterdı öŋdeu ortalyǧyn salu boiynşa kelısımşart jasalǧanyn jetkızdı. Vise-ministrdıŋ sözınşe, būl infraqūrylymdyq quattar jaqyn bolaşaqta otandyq startaptar men zertteuşılerge keŋınen qoljetımdı bolmaq.
Universitet pen onyŋ zertteu baǧyttaryn damytu maqsatynda älemdık deŋgeidegı jetekşı akademiialyq jäne industriialyq ūiymdarmen yntymaqtastyq ornatylǧan. Akademiialyq serıktester qatarynda Shanghai Innovation Institute, Carnegie Mellon University, Tsinghua University, Shanghai Jiao Tong University jäne University of Helsinki bar. İndustriialyq serıktester retınde Samsung, Lenovo, Google, Huawei, Yalong, Unitree, Asus jäne Dr.Web kompaniialary ataldy.
Universitet rektorynyŋ keŋesşısı Aidyn Sabitov belgılegendei, JOO-nyŋ EXPO aumaǧynda, Astana Hub men AI-sentrmen bırge ornalasuy kezdeisoq emes. Studentter bılım alyp, stajirovkadan ötıp, öz jobalaryn osy ekosistema ışınde jüzege asyrady, al jas käsıpkerler üşın arnaiy qarjylandyru baǧdarlamalary qarastyrylǧan. Vise-ministrdıŋ aituynşa, būl infraqūrylym bılıktı mamandardyŋ şetelge ketıp qaluyna emes, el ışınde qalyp, otandyq IT, ǧylym men startaptardy damytuǧa mümkındık beredı.
