Maŋǧystau oblysyndaǧy Qaraqabaq qorymynan şamamen 1500 jyl būryn jerlengen aqsüiek äieldıŋ qabırı tabyldy, dep habarlaidy "Adyrna" ūlttyq portaly.
Arheologtar jerleu ornynan altyn jalatylǧan aiaq kiımnıŋ metall bölşekterın, belbeu jäne bas kiım äşekeilerın anyqtady.
Zertteuşılerdıŋ mälımetınşe, jerleu V ǧasyrdyŋ ekınşı jartysy men VI ǧasyrdyŋ bırınşı jartysyna jatady. Qabırden tabylǧan būiymdar keiıngı ǧūn jäne postǧūn kezeŋderıne tän Şipov gorizontymen bailanystyrylady. Qabırdegı äieldıŋ saltanatty kiımmen jerlengenı anyqtalǧan. Onyŋ bas kiımı döŋgelek altyn japsyrmalarmen jäne qyzyl matadan jasalǧan diademamen bezendırılgen. Maŋdai bölıgındegı ortalyq altyn japsyrma antikalyq dästürdegı Meduza beinesı – gorgoneon pışınınde jasalǧan. Sondai-aq kiımnen ejelgı skif dästürıne tän altyn jalatylǧan äşekeiler tabylǧan.
Arheologtar aiaq kiım men belbeudıŋ keibır bölşekterınde qajettı bekıtkışterdıŋ bolmauyna nazar audarǧan. Osyǧan bailanysty būiymdar kündelıktı paidalanuǧa emes, arnaiy jerleu räsımıne arnalǧan boluy mümkın degen boljam jasalyp otyr. Mūndai kiım marqūm äieldıŋ äleumettık märtebesın körsetu maqsatynda qoldanylǧan. Ǧalymdardyŋ aituynşa, altyn bölşekterdıŋ bır bölıgı Qaraqabaq aumaǧyndaǧy jergılıktı şeberhanalarda jasaluy mümkın. Qonystan metallurgiia, zergerlık, şyny jasau jäne qyş öndırısıne qatysty nysandardyŋ ızderı tabylǧan.
Qaraqabaqtyŋ Kaspii teŋızınıŋ şyǧys jaǧalauyndaǧy maŋyzdy qolöner jäne sauda ortalyqtarynyŋ bırı bolǧany boljanady. Ejelgı kezeŋde būl aumaq Ortalyq Aziiany Soltüstık Kavkaz, Edıl boiy, Oŋtüstık Oral jäne basqa öŋırlermen bailanystyratyn sauda baǧyttarynyŋ torabynda ornalasqan.
Osyǧan ūqsas arheologiialyq jädıgerler būǧan deiın körşıles Altynqazǧan eskertkışınen de tabylǧan.
